Sot sheshiminsiz turǵyn úıden aıyrýǵa bolmaıdy – Aıdos Sarym

ASTANA. KAZINFORM – Qazaqstanda azamattardy sot sheshiminsiz turǵyn úıinen aıyrýǵa jol bermeý qaǵıdaty zańnamalyq turǵyda kúsheıtilýi múmkin. Bul týraly QR Parlamenti Májilisiniń depýtaty Aıdos Sarym Jibek Joly telearnasynyń Live baǵdarlamasynda málimdedi.

Depýtattyń aıtýynsha, atalǵan norma Memleket basshysynyń Úkimettiń keńeıtilgen otyrysynda kótergen bastamasynan keıin jan-jaqty talqylanǵan. 

– Bul normanyń qalaı týyndaǵanyn aıtyp óteıin. Prezıdent Úkimettiń keńeıtilgen otyrysynda osy máseleni arnaıy kóterdi. Prezıdentke on myńnan astam usynys tústi, sonyń ishinde bul problema bar ekeni aıtyldy. Osyǵan baılanysty biz bir otyrysymyzdy tolyqtaı osy taqyrypqa arnadyq, – dedi Aıdos Sarym.

Onyń sózinshe, Arnaıy jumys toby halyqaralyq qujattardy, otbasylyq jáne áleýmettik sıpattaǵy jaǵdaılardy saralap, quqyqtyq tetikterdi zerdelegen.

– Talqylaýǵa Adam quqyqtary jónindegi ýákil men Bala quqyqtary jónindegi ýákil qatysyp, máseleniń ózektiligin rastady. Sonymen qatar halyqaralyq qujattardaǵy ustanymdardy zerttedik. Nátıjesinde usynystar ázirlenip, tıisti norma zań jobasyna engizildi, – dedi depýtat.

Aıdos Sarym jańa ózgeristerdiń negizgi maqsaty – azamattardyń jalǵyz baspanasyn qorǵaý ekenin atap ótti. Ásirese nesıe mindettemeleri, ekonomıkalyq daýlar nemese ajyrasý sekildi jaǵdaılarda otbasynyń áleýmettik ahýaly eskerilmek.

– Eger zańdy rásim bolmasa, mysaly qystyń kúni adamdy dalaǵa shyǵaryp jiberýge bolmaıdy. Eger bul jalǵyz múlik bolsa, ony tartyp alýǵa bolmaıdy degen prıntsıpterdi keshendi túrde Ata zańǵa engizip jatyrmyz, – dep túıindedi ol.

Aıta keteıik, buǵan deıin Konstıtýtsııalyq komıssııanyń otyrysynda Bala quqyqtary jónindegi ýákil Dınara Zákıeva Balalar múddesi aıasynda baspanadan shyǵarýǵa jol bermeıtin kepildikter bekitý mańyzdy ekendigin aıtqan edi.