«Sot sheshimin joıý úshin 10 mln dollar usyndy»: Shymkenttegi sý mekemesi jelidegi aqparatqa jaýap berdi
ShYMKENT. KAZINFORM — Shymkenttegi eń iri sý jetkizýshi operator tóńireginde taǵy da daý týyndady. Áleýmettik jelilerde «Sý resýrstary — Marketıng» kompanııasyna qatysty sot sheshimin iri kólemdegi syıaqy usyný arqyly ózgertýge áreket jasalǵany jóninde habarlamalar tarady.
Kompanııa bul habarlamalardy aqparattyq shabýyl dep atap, olardyń eshqandaı dáleli joq ekenin málimdedi.
Internette Shymkent sý arnasyna qatysty sot protsesine yqpal ete alatyn deldaldardy izdeý týraly jazbalar paıda bolǵan. Onda «máseleni sheshý» úshin 10 mln dollardan astam qarjy jáne Ramada by Wyndham Shymkent qonaqúıi usynylýy múmkin degen boljam aıtylǵan.
Keıbir jarııalanymdar bul jaǵdaıdy kásipker, buryn Shymkent qalasynyń eki ret ákimi bolǵan Anarbek Ormannyń esimimen baılanystyrady. Jazbalarda 90-jyldardyń sońynda qalanyń sý ınfraqurylymy jekeshelendirilip, onyń baqylaýy A.Ormanǵa qatysy bar «Sý resýrstary — Marketıng» JShS-ne ótken degen pikirler aıtylǵan.
Al kompanııa Kazinform agenttiginiń resmı saýalyna bergen jaýabynda mundaı jarııalanymdardyń eshqandaı dálelge negizdelmegenin jáne qoǵamda teris pikir qalyptastyrýǵa baǵyttalǵanyn málim etti.
— Sot sheshimin iri syıaqy arqyly joıýǵa áreket jasaldy degen derekkózderge jasalǵan siltemelerdiń eshqaısysy naqty dálelmen rastalmaǵan. Bul — qaýesetter men jalǵan aqparattardyń taralýy, — dep habarlady «Sý resýrstary — Marketıng» mekemesi.
Kompanııanyń pikirinshe, mundaı jarııalanymdar sotqa qysym kórsetý áreketi bolýy múmkin.
— Mundaı materıaldar aqparattyq shabýylǵa uqsaıdy jáne sot organdaryna qoǵamdyq qysym kórsetý arqyly olardyń zańdy ári obektıvti sheshim qabyldaýyna áser etýge baǵyttalǵan, — dedi kompanııa ókilderi.
Sondaı-aq kompanııa sot sheshimderi áleýmettik jelilerdegi nemese Telegram-arnalardaǵy jarııalanymdardyń yqpalymen emes, tek zań men naqty dálelderge súıene otyryp qabyldanýy tıis ekenin atap ótti.
«Sý resýrstary — Marketıng» JShS bul istiń ádil ári táýelsiz qaralatynyna senim bildirdi.
— Qorytyndy sot sheshimi tek quqyqtyq normalarǵa saı jáne ádildik qaǵıdattaryna sáıkes qabyldanady dep senemiz, — dep naqtylady kompanııa.
Eske salaıyq, Shymkenttegi eń iri sý jetkizýshi operator — «Sý resýrstary — Marketıng» JShS tóńiregindegi daý birneshe jyldan beri jalǵasyp keledi. Kompanııa qalanyń sý júıesin 2000-jyldardyń basynan beri basqarady. Mekemeniń shamamen 22 paıyz aktsııasy memleketke tıesili.
Sońǵy jyldary bılik organdary sot arqyly sý ınfraqurylymynyń bir bóligin memleket menshigine qaıtarýǵa áreket jasap jatyr.
Shymkent qalasynyń mamandandyrylǵan aýdanaralyq ekonomıkalyq soty buǵan deıin jeke menshikke berilgen 6 nysan boıynsha aýktsıon hattamalary men satyp alý-satý kelisimsharttaryn jaramsyz dep tanydy.
Atap aıtqanda, Aqbaı-Qarasý sý alý qurylysynyń aıaqtalmaǵan nysany, «Badam-Saıram», «Qyzylsaı» jáne «Tassaı» sý alý kásiporyndary, «Trans-Vık» avtokólik tsehy men «Ýnıkan-servıs» kásiporny memleket menshigine qaıtarylýy tıis dep sheshildi. Alaıda «Sý resýrstary — Marketıng» JShS bul sheshimmen kelispeıtinin bildirdi.
Buǵan deıin qala bıligi memleket menshigine tek sý alý nysandaryn ǵana qaıtarý josparlanyp otyrǵanyn málimdegen. Al qalǵan ınfraqurylym — tazartý stantsııalary, sý qubyrlary jelisi jáne kompanııanyń ózi jeke basqarýda qalýy tıis.
Shymkent qalasynyń ákimi Ǵabıt Syzdyqbekov osy jaǵdaıǵa qatysty pikir bildirip, qalanyń sý júıesi strategııalyq mańyzy bar sala ekenin atap ótti. Sondaı-aq ol bul másele boıynsha sot sheshimin kútetinin aıtqan edi.
