Sot sheshimin oryndamaǵan Oral ákimi memleketke 700 myńnan asa teńge tóleıdi

ORAL. KAZINFORM – Sot sheshimin oryndamaǵan Oral qalasy ákimi 2 is boıynsha jazalanyp, memleketke 100 AEK kóleminde qarjy tóleıtin boldy.

BQO sotynyń baspasóz qyzmetinen málim etkenindeı, 15 talapker qala ákimdigine baý-baqsha seriktestikterinde jer ýchaskelerin bólý týraly ótinishpen júginip, bas tartý týraly qaýly alǵan.

Bas tartýmen kelispeı, talapkerler eki talap aryzben BQO mamandandyrylǵan aýdanaralyq ákimshilik sotyna júgindi.

Birinshi is boıynsha baý-baqsha seriktestikterindegi talapkerlerdiń ýchaskeni kútip ustaý aýyrtpalyǵyn kótergeni jáne kóteretini, múshelik jarnalardy tóleý boıynsha mindettemelerdi oryndaıtyny anyqtaldy.

Sot saıajaı qoǵamdarynyń shekaralaryn belgilemeý talapkerge onyń jer ýchaskesin jeke menshikke alý quqyǵyn iske asyrýǵa kedergi bola almaıdy dep eseptedi.

Osylaısha, 7 talapkerdiń talap qoıýlary tolyq kólemde qanaǵattandyryldy, qala ákimdiginiń qaýlylary zańsyz dep tanyldy.

Sot jaýapkerdi sot sheshimi kúshine engen kúnnen bastap on jumys kúni ishinde baý-baqsha ósirýge jer ýchaskelerin berý týraly sheshim qabyldaý arqyly talapkerlerdiń buzylǵan quqyqtaryn qalpyna keltirýge mindettedi.

Ekinshi istiń materıaldaryna sáıkes, eki talapker ýaqytsha óteýli qysqa merzimdi jer paıdalaný quqyǵynda jer ýchaskelerine ıelik etedi, jer ýchaskelerinde tirkelgen qurylystar ornalasqan.

Іstiń sot belgilegen mán-jaılarynan atalǵan talapkerler aýyl sharýashylyǵy maqsatyndaǵy jerlerden jańa jer ýchaskelerine emes, olardyń naqty ıeligindegi, buryn berilgen jerlerge (qosymsha ýchaskege) úmitker boldy.

Osyǵan baılanysty talap qoıý talaptaryn ishinara qanaǵattandyrý týraly sheshim shyǵaryldy, eki talapkerdiń talap qoıýlary qanaǵattandyryldy. Jaýapkerge talapkerlerdiń ótinishterin qaıta qaraý mindeti júkteldi. Qalǵan 6 talapkerdiń talap qoıýlaryn qanaǵattandyrýdan bas tartyldy.

Sottyń eki sheshimi de zańdy kúshine endi.

«Alaıda jaýapker, Oral qalasynyń ákimi sottyń sheshimin merziminde oryndamaǵan, bul QR Ákimshilik rásimdik protsestik kodekstiń 127-babyna sáıkes aqshalaı óndirip alý túrindegi protsestik májbúrleý sharasyna ákep soǵady.

Sot sheshimderin oryndamaǵany úshin BQO mamandandyrylǵan aýdanaralyq ákimshilik sotynyń uıǵarymdarymen jaýapker, Oral qalasynyń ákimine ár is boıynsha 50 AEK mólsherinde (369 myń teńge) aqshalaı óndirip alý salyndy.

Qoldanylǵan aqshalaı óndirip alýǵa qaramastan, jaýapker ekinshi ákimshilik is boıynsha sottyń sheshimin oryndamady.

Osyǵan baılanysty, sottyń uıǵarymymen jaýapkerge 60 AEK mólsherinde qaıta aqshalaı óndirip alý (221 520 teńge) salyndy. Sottyń uıǵarymdary zańdy kúshine engen joq», dep habarlady vedomstvodan.

Eske sala keteıik, budan buryn Oralda komıssııanyń ákimdiktiń apparat basshysyna zańsyz páter bergenin jazǵan bolatynbyz.