Sot sheshimderiniń basym bóligi azamattardyń múddesine saı shyǵaryldy - Prezıdent
ASTANA. KAZINFORM – Kúmán týdyratyn máselelerdiń barlyǵy ádiletti túrde adal azamattardyń paıdasyna sheshilip jatyr. Bul týraly elordadaǵy «Ákimshilik ádilet jáne onyń quqyq ústemdigin qamtamasyz etýdegi róli» atty halyqaralyq forýmda Memleket basshysy Qasym-Jomart Toqaev málim etti.
- Elimizdegi sot tájirıbesi úshin de betburys kezeńi bastaldy. Ashyǵyn aıtýymyz kerek, buǵan deıin azamattar úshin memlekettik organdardyń sheshimderine jáne áreketterine shaǵymdaný, ıaǵnı, óz quqyǵyn qorǵaý ońaı bolmaıtyn. Ákimshilik ádilet júıesi iske qosylǵan soń jaǵdaı túbegeıli ózgerdi. Eń bastysy, kúmán týdyratyn máselelerdiń bári ádiletti túrde adal azamattardyń paıdasyna sheshiletin boldy, - dedi Qasym-Jomart Toqaev.
Osy oraıda Prezıdent sottar dáleldeme jınaý jumysyna erekshe mán bere bastaǵanyn aıtty.
- Bul - memlekettik organdar ózderiniń sheshimderin jáne áreketterin zań júzinde dáleldeýge mindetti degen sóz. Statıstıkaǵa qaraıtyn bolsaq, sońǵy jyldary sot sheshimderiniń jartysynan kóbi azamattar men bıznestiń múddesine saı shyǵarylǵan. Bul da ákimshilik ádilet júıesiniń naqty nátıjesi ekeni sózsiz. Osylaısha, qoǵamymyz «sýdıalar árdaıym bılik ókilderin jaqtaıdy» degen qasań pikirden aryla bastady, - dedi Memleket basshysy.
Buǵan deıin habarlanǵandaı, forým barysynda Prezıdent memleket pen qoǵam tutastyǵyn nyǵaıtý aldyńǵy qatarly mindettiń biri ekenin atap ótti.
