Sot sheshimi: Tramp Aq úıdegi bal zalynyń qurylysyn jalǵastyrady
ASTANA. KAZINFORM — AQSh Joǵarǵy soty Aq úıdiń 400 mıllıon dollarlyq bal zalynyń qurylysyn jalǵastyrýǵa ruqsat berdi. Bul týraly Kazinform agenttigi BBC-ge silteme jasap habarlaıdy.
Ulttyq tarıhı murany saqtaý qory sotqa joldaǵan talap aryzynda prezıdenttiń mundaı aýqymdy qurylysty óz betinshe bastaýǵa ókilettigi joq ekenin málimdedi.
Sot alqasy 5 sýdıanyń qoldaýymen, 4 sýdıanyń qarsylyǵyna qaramastan Tramp ákimshiliginiń ótinishin qanaǵattandyrdy. Nátıjesinde jobanyń jerústi bóliginiń qurylysyn toqtatýǵa tıis tómengi ınstantsııalardyń sheshimderin buǵattady.
Alaıda Joǵarǵy sottyń tóraǵasy, konservator Djon Roberts erekshe pikir bildirgen úsh lıberal sýdıanyń ustanymyn qoldady. Ol Kongress bul jobany maquldamaǵandyqtan, «qurylystyń zańsyz bolýy múmkin» ekenin aıtty.
Ulttyq tarıhı murany saqtaý qory prezıdenttiń qurylysty óz betinshe bastaýǵa ókilettigi joq ekenin alǵa tartyp, sotqa shaǵym túsirdi.
Ótken kúzde Tramp Aq úıdiń tarıhı Shyǵys qanatyn buzyp, onyń ornyna bal zalyn salýdy bastady. Aq úı ákimshiligi jobanyń negizgi bóligi qarasha aıyna deıin aıaqtalatynyn, al qurylystyń 2028 jyldyń tamyzynda tolyq bitetinin málimdedi.
Juma kúni Joǵarǵy sot sýdıalar jobany tolyq toqtatýdy kózdegen talap aryzdy qarap, aýmaǵy 90 myń sharshy fýt (8,4 myń sharshy metr) bolatyn bal zalynyń qurylysyn jalǵastyrýǵa ýaqytsha ruqsat berdi.
Dúısenbide jarııalanǵan sot qaýlysynda qurylysty jalǵastyrýǵa ruqsat bergen bes sýdıa tómengi ınstantsııadaǵy sottar qurylysty toqtatý arqyly «óz ókilettigin asyra paıdalanǵan bolýy múmkin» dep málimdedi.
Sýdıalardyń kópshiligi Aq úıdiń Shyǵys qanaty jobasynyń zańdylyǵy týraly sheshim shyǵarǵan joq, biraq tarıhı murany saqtaýǵa atsalysyp júrgen uıymnyń úkimetti sotqa berýge «protsessýaldyq quqyǵy joq» ekenin atap ótti.
Sýdıalar Tramp ákimshiligi tómengi satydaǵy sot sheshiminiń kúshin joımasa, «ózi utylýy múmkin» ekenin dáleldedi degen qorytyndyǵa keldi.
— Búgingi sheshim bılikti bólý qaǵıdatynyń jeńisi emes, — dep jazdy bas sýdıa Roberts óziniń pikirinde.
Sot sheshimine qatysty pikir bildirgen Tramp negizsiz talap aryzdyń qurylysty toqtata almaǵanyna qýanyshty ekenin jazdy.
— Biz Amerıkanyń altyn dáýirinde ómir súrip jatyrmyz. Bul ǵımarat Vashıngtonda buryn-sońdy salynǵan eń uly nysandardyń birine aınalady, — dedi ol.
Tramp Aq úıge is-sharalar ótkizý úshin keńirek oryn qajet ekenin burynnan aıtyp keledi. Sońǵy ýaqytta ol mundaı nysannyń óz qaýipsizdigin qamtamasyz etý úshin de qajet ekenin málimdedi.
AQSh prezıdenti sáýirde Aq úı tilshileri qaýymdastyǵynyń keshki asy kezinde ózine qastandyq jasaý áreketi boldy degen boljamnan keıin bal zalyn salý qajettigin erekshe atap ótti. Alaıda Ulttyq tarıhı murany saqtaý qory bul qurylys tarıhı nysanǵa orny tolmas zııan keltirip jatqanyn aıtty. Bul ustanymǵa Vashıngton turǵyny, tarıhı murany saqtaý salasynyń mamany jáne qordyń qamqorshylyq keńesiniń múshesi Elıson Hoglandtyń málimdemesi negiz boldy.
Bul aýmaqqa aıyna bir ret baryp turatynyn aıtqan Hogland usynylǵan tıptegi jáne aýqymdaǵy bal zaly salynsa, ǵımarattyń estetıkalyq, mádenı ári tarıhı múddelerine nuqsan keletinin málimdedi.
Sot tóraǵasy Roberts óz pikirinde Hogland aıtqan derekterdiń talap aryzdy qaraý úshin jetkilikti ekenin atap ótti.
Bal zaly men Ońtústik kógalda salynyp jatqan tikushaq alańy — Tramptyń Vashıngtonnyń kelbetin ózgertýge baǵyttalǵan aýqymdy josparynyń bir bóligi ǵana.
Tramptyń josparynda Lınkoln memorıaly mańyndaǵy basseındi qaıta jańartý jáne Parıjdegi Trıýmf qaqpasynan da bıik «Tramp qaqpasyn» turǵyzý bar.
Aıta keteıik, buǵan deıin AQSh prezıdentiniń Vashıngtonda álemdegi eń úlken trıýmfaldi qaqpa saldyratynyn habarlaǵan edik.
Aqzat Jıenalına
