Sot sheshimi: Google men Meta áleýmettik jelidegi táýeldilik úshin $ 6 mln tóleıdi
ASTANA. KAZINFORM – Los-Andjelestegi alqabıler soty tehnologııalyq korporatsııalar Meta (Facebook jáne Instagram ıesi) men Alphabet-ti (Google jáne YouTube ıesi) áleýmettik jelilerge táýeldilik saldarynan keltirilgen psıhologııalyq zııan úshin 20 jastaǵy qoldanýshyǵa ótemaqy tóleýge mindettedi, dep habarlaıdy DW.
Bloomberg málimetinshe, sot sheshimimen kompanııalar qyzǵa 4,2 mln dollar kóleminde ótemaqy tóleýi tıis. Budan bólek, Meta men Alphabet 1,8 mln dollar aıyppul tóleýge mindetteldi.
Talapker sotqa YouTube pen Instagram platformalarynyń táýeldilik týdyratyn erekshe dızaıny saldarynan zardap shekkenin aıtyp júgingen. Alqabıler kompanııalar bul platformalardy ázirleý kezinde salǵyrttyq tanytyp, paıdalanýshylardy yqtımal qaýipter týraly eskertpegen degen qorytyndyǵa keldi. Bloomberg-tiń aqparatyna súıensek, bul sheshim tehnologııalyq alpaýyttardy paıdalanýshy kelisimderi men qaýipsizdik saıasattaryn qaıta qaraýǵa májbúr etýi múmkin. Degenmen Meta men Alphabet úkimge shaǵymdanatynyn málimdedi.
Sot protsesi barysynda talapkerdiń advokattary platformalardyń mazmunyna emes, dál olardyń dızaınyna nazar aýdardy. Olar kompanııalar qoldanýshylardy, sonyń ishinde balalardy, táýeldi etýge ádeıi baǵyttalǵan sheshimder qabyldaǵanyn dáleldeýge tyrysty jáne alqabılerdi soǵan sendire aldy.
Óz kezeginde Meta zańgerleri talapkerdiń psıhologııalyq máseleleri áleýmettik jelilerge emes, kúrdeli otbasylyq jaǵdaıǵa baılanysty týyndaǵanyn alǵa tartty. Sonymen qatar TikTok pen Snapchat ta bastapqyda jaýapker retinde kórsetilgen, alaıda sot bastalǵanǵa deıin olar isti sottan tys kelisim arqyly japqan.
Sońǵy jyldary iri tehnologııalyq kompanııalar kámeletke tolmaǵandar arasynda táýeldilik týdyrýy múmkin platformalar dızaıny úshin jıi synǵa ushyrap keledi. AQSh Kongresi áleýmettik jelilerdi retteıtin federaldyq zań qabyldamaǵandyqtan, shekteýler kóbine jekelegen shtattar deńgeıinde nemese sot sheshimderi arqyly engizilip keledi.
2025 jyly AQSh-tyń shamamen 20 shtaty kámeletke tolmaǵandardyń áleýmettik jelilerdi paıdalanýyn retteıtin zańdar qabyldady. Sarapshylardyń pikirinshe, 2026 jyldyń sońyna deıin áleýmettik jelige táýeldilikke qatysty taǵy birneshe mańyzdy sot sheshimi shyǵýy múmkin. Apta basynda Nıý-Meksıko shtatynda alqabıler Meta kompanııasyn balalarǵa qaýip tóndirgeni úshin kináli dep tanyǵan.
Sońǵy bir jylda áleýmettik jelilerdi balalar men jasóspirimderge paıdalanýǵa tyıym salý nemese qatań shekteý engizý Aýstralııa, Frantsııa, Ispanııa, Portýgalııa jáne Malaızııada júzege asyryldy. Osyndaı zań jobalary Germanııa, Grekııa, Danııa, Norvegııa jáne Slovenııa parlamentterinde talqylanyp jatyr.
Aıta keteıik, Lıtvada 16 jasqa deıingi balalardyń áleýmettik jelilerge kirýin shekteý usynyldy.
Al Túrkııada áleýmettik jelilerge qatysty talap kúsheıip jatyr.