Sot sheshimin oryndamaǵan Aqtaý ákimine aıyppul salyndy

AQTAÝ. QazAqparat - Zańdy kúshine engen sot sheshimin oryndamaǵany úshin Aqtaý qalasynyń ákimine aqshalaı óndirip alý qoldanyldy, dep habarlaıdy QazAqparat Mańǵystaý oblysynyń mamandandyrylǵan aýdanaralyq ákimshilik sotynyń baspasóz qyzmetine silteme jasap.

Mańǵystaý oblysynyń mamandandyrylǵan aýdanaralyq ákimshilik sotynyń sheshimimen JShS-tiń Aqtaý qalasynyń ákimine qatysty talaby qanaǵattandyrylǵan. Atap aıtsaq, sot sheshimimen jaýapkerdiń jer ýchaskesiniń nysanaly maqsatyn ózgertýden bas tartýy zańsyz dep tanylyp, jerdiń nysanaly maqsatyn ózgertýdi, ıaǵnı bir aı ishinde JShS-niń paıdasyna qolaıly ákimshilik akt qabyldaý mindettelgen.

Alaıda, osy ýaqytqa deıin sot sheshimi oryndalmaǵan, jetkilikti ýaqyt ótse de qala ákimi qolaıly ákimshilik akti qabyldaýǵa eshqandaı shara qoldanbaǵan.

Ákimshilik kodekstiń talaptaryna sáıkes, sot sheshimderin oryndaý sottyń baqylaýynda jáne olardy oryndaýdan jaltarý 50 AEK mólsherinde aqshalaı óndirip alýǵa ákep soǵady.

Nátıjesinde, sot uıǵarymymen Aqtaý qalasynyń ákimine qatysty 50 AEK mólsherinde, ıaǵnı 172 500 teńge aqshalaı óndirip alý sharasy qoldanylǵan.

«Ákim aqshalaı óndirip alýdy 5 kún ishinde tóleýi jáne sot sheshimin 10 kún ishinde oryndaýy kerek. Áıtpese, aqshalaı óndirip alý 10 AEK-ke ulǵaıtylǵan mólsherde qaıta qoldanylatyn bolady», -delingen Mańǵystaý oblysynyń mamandandyrylǵan aýdanaralyq ákimshilik sotynyń baspasóz qyzmeti taratqan habarlamada.