Sot sheshimderiniń ádil ári ashyq bolýy úshin barlyq sharalardy qoldanyp otyrmyz - M.Álimbekov
ASTANA. Qarashanyń 5-i. QazAqparat /Aıdar Ospanalıev/ - Sot qyzmetkerleri men aqparat quraldary ókilderiniń basty mindeti - memleket pen qoǵamǵa qyzmet etý.
Atalmysh sala ókilderiniń qazirgi tańdaǵy baılanystary tap osy mindetter negizinde qalyptasyp otyr. Búgingi tańda sot ádildigin qamtamasyz etýdi jarııaly ári ashyq júrgizý, sot málimetteriniń barynsha qoljetimdi bolýy - Joǵarǵy sottyń basty strategııalyq baǵyttarynyń biri. Bul týraly búgin Astanada ótip jatqan «Sot bıligi jáne BAQ» turaqty forýmynda Joǵarǵy sot tóraǵasy Musabek Álimbekov málim etti, dep habarlaıdy QazAqparat.
Onyń sózine qaraǵanda, sot organdarynyń aqparat quraldarymen yqpaldastyqty qalyptastyrýdaǵy mańyzdy máselelerdiń biri - ózara dıalog. Búginde sot organdary óz sheshimderiniń meılinshe ádil bolýyn qamtamasyz etý maqsatynda qajetti sharalardyń barlyǵyn qoldanýda. «Mysaly, Joǵarǵy sot osyǵan deıin eki normatıvti qaýly qabyldaǵan bolatyn. Onda sot sheshimderin jarııalaıtyn elektrondy muraǵat qyzmetin jolǵa qoıý mindeti qarastyrylǵan. Onda qazir 400 myńnan astam sot aktileri ornalastyrylǵan. Biz bul baǵyttaǵy jumystardyń mańyzdylyǵyn talmaı aıtyp kelemiz», dedi tóraǵa.
Onyń aıtýynsha, qazir sot qyzmetin ózgeler tarapynan boljamdar men joramaldar jasaýǵa jol bermeıtindeı, naqty ári túsinikti etip júzege asyrý qajet. «Qandaı da bolsyn atqarylatyn istiń ózgelerge jarııa bolyp, ózgeler tarapynan baqylaý bolǵan jaǵdaıda barynsha taza bolatyndyǵy málim. Onyń ústine bul jaǵdaı óz isine nemquraıly qaraıtyn azamattardyń qyzmet babyn paıdalanýǵa da jol bermeıdi. Biz buny jaqsy túsinemiz. Sondyqtan men sot qabyrǵasynda ótken selektorlyq májilisterdiń birin tap osy máselege arnaǵan bolatynmyn. Onda eldegi barlyq sýdıalardy barynsha ashyq bolýǵa jáne aqparat quraldarynyń ókilderimen barynsha belsendi baılanysta jumys isteýge shaqyrdym», dedi M.Álimbekov.
