Sot Seıitqazy Mataevty kepilge jiberýge kelispedi
ASTANA. QazAqparat - Búgin Astanadaǵy №2 Esil aýdandyq sotynda Seıitqazy jáne Áset Mataevtarǵa qatysty qozǵalǵan qylmystyq is boıynsha aldyn-ala sot tyńdaýy ótti. Sotqa tóraǵalyq etýshi sýdıa Aqbolat Qurmantaev sottalýshylardy kepilge jiberýge kelispedi jáne osy qylmystyq is boıynsha negizgi sot otyrysyn aǵymdaǵy jyldyń 23-inshi tamyzyna belgiledi.
Sot tyńdaýynan keıin Mataevtardyń qorǵaýshylary - Mádına Bakıeva, Andreı Petrov jáne Serikqalı Mýsınder jeti ótinish bildirdi. Olar sot zalyna kompıýter ákelýdi, kardıolog-dárigerdiń otyrysqa qatysýyn, ákeli-balaly Mataevtardy úıqamaqtan kepilge bosatýdy, qylmystyq is materıaldary boıynsha ekonomıkalyq saraptama júrgizýdi, ózderi qorǵaıtyn adamdardy qolaıly páterge aýystyrýdy, sottyń qylmystyq isti qaraý merzimin uzartýdy jáne basty sot otyrystaryn Almaty qalasynda ótkizýdi ótindi. Bir saǵat ýaqytqa keńesý bólmesine ketken sýdıa Aqbolat Qurmantaev joǵarydaǵy ótinishterdiń tek úsheýin ǵana qanaǵattandyrdy.
Saıyp kelgende, sýdıa joǵarydaǵy ótinishterdiń úsheýin ǵana qanaǵattandyrdy. Ol sotqa kardıolog-dárigerdiń qatysýyna ruqsat etti. Sebebi sottaǵy tyńdaýda qorǵaýshylar Seıitqazy Mataevtyń densaýlyǵynyń máz emes ekenin aıtyp, shaǵymdanǵan bolatyn. Sonymen qatar, sot sheshimimen qorǵaýshylar sot zalyna kompıýterlerin ákelýge múmkindik aldy. Úshinshiden, tóraǵalyq etýshi sýdıa qylmystyq is boıynsha materıaldardy qaraý merzimin uzartty. Sebebi qorǵaýshylar materıaldarmen tolyq tanysý úshin isti qaraý merzimin uzartýdy suraǵan bolatyn. Aqbolat Qurmantaev atalǵan qylmystyq is boıynsha eń basty sot otyrysyn aǵymdaǵy jyldyń 23-inshi tamyzyna belgiledi.
Jeti ótinishtiń tórteýi qanaǵattandyrylmady. Buǵan deıin memlekettik aıyptaýshy Erjan Quraqbaev Seıitqazy jáne Áset Mataevtardy kepilge bosatý týraly ótinishti qanaǵattandyrýǵa eshqandaı negiz joqtyǵyn málimdegen. «Qazirgi kezge deıin S. Mataev keltirilgen shyǵyndy ótegen joq, tergeýge kómek kórsetken joq. Sol sebepti dál qazir Seıitqazy jáne Áset Mataevtardy úıqamaqtan kepilge bosatýǵa eshqandaı negiz joq»,- dedi E. Quraqbaev. Sonymen qatar, protsessýaldy prokýror qylmystyq istiń qylmystyq zań buzýshylyqtar oryn alǵan jerde qaralýy tıistigin túsindirdi. «Sotqa deıingi tergeýden anyqtalǵanyndaı, bıýdjet qarajatyn jymqyrý jáne salyq tóleýden jaltarý oqıǵalary Astananyń Esil aýdanynyń aýmaǵynda bolǵan. Osyǵan oraı, qylmystyq istiń №2 Esil aýdandyq sotynda qaralýy oryndy» dep sózin túıindedi prokýror.
«Basty sot otyrysy 2016 jyldyń 23-inshi tamyzyna saǵat 10-ǵa belgilenedi. Ol Astana qalasynyń №2 Esil aýdandyq sotynyń 214-inshi sot zalynda ashyq jaǵdaıda ótkiziledi. Sottalýshylarǵa qatysty bultartpaý sharasyn burynǵysha - ıaǵnı úıqamaq bolyp qala beredi»,- dep habarlady sýdıa. Aıyptalýshylardy kepilge bosatý týraly ótinishke sýdıa A. Qurmantaev mynadaı túsinik berdi: «Aıyptalýshylardy úıqamaqtan kepilge bosatýdy týraly ótinishti biz qanaǵattandyrǵan joqpyz. Sebebi kepilge bosatylǵan jaǵdaıda olardyń tarapynan kýágerlerge qysym jasalýy múmkin».
Aıta ketelik, Qazaqstan jýrnalıster odaǵynyń basshysy Seıitqazy Mataev pen «QazTAG» halyqaralyq aqparattyq agenttiginiń bas dırektory Áset Mataev alaıaqtyq jáne salyq tóleýden jaltarý baptary boıynsha aıyptalýda.
Ámirlan Álimjan
