Sot Serik Ahmetovti merziminen buryn bosatý ótinishin qanaǵattandyrmady
QARAǴANDY. QazAqparat – Búgin Qaraǵandy qalasynyń Qazybek bı aýdandyq sotynda burynǵy Premer-Mınstr Serik Ahmetovty merziminen buryn shartty túrde bosatý isi qaraldy, dep habarlaıdy QazAqparat tilshisi.
Sottyń baspasóz qyzmetiniń habarlaýynsha, Serik Ahmetovtiń qorǵaýshysy Nıkolaı Lesnık Joǵarǵy Sottyń tıisti normatıvtik qaýlysyn dálel retinde keltirdi.
Qorǵaýshynyń aıtýynsha, shartty túrde merziminen buryn bosatý úshin eki basty talap oryndaldy. Bul kelgen shyǵyn kólemin óteý jáne sottalǵannyń tarapynan buzýshylyqtardyń bolmaýy.
Sonymen qatar, Nıkolaı Lesnık materıaldyq quqyqtyń osy normasynyń negizinde Ahmetovty jazanyń ótelmegen qalǵan merzimine memlekettik organdarda qyzmet atqarý quqyǵynan aıyrý túrindegi qosymsha jaza túrinen bosatý týraly máseleni qarastyrýdy surady.
Alaıda prokýror Ásem Tergeýbekova sottan ótinishti qanaǵattandyrýdan bas tartýdy usyndy.
«Qaraǵandy qalasy Qazybek bı aýdany probatsııa qyzmetiniń usynǵan málimetterin zerdeleı kele, Serik Ahmetovtiń ótinishi sottalǵannyń túzelgenin jáne onyń jazasyn ári qaraı óteýdi qajet etpeıtinin dáleldeıtin málimetterdiń usynylmaýyna baılanysty tolyq kólemde bas tartýǵa jatady dep sanaımyn», - dep atap ótti prokýror.
Sot Serik Ahmetovke qatysty bas bostandyǵyn shekteý túrindegi jazany merziminen buryn shartty túrde bosatýǵa aýystyrýdan bas tartty.
Eske salsaq, Serik Ahmetovtiń bostandyqqa shyǵarý týraly qaýly kúshine engen edi.
