Sot saraptamasyna qoldanyp júrgen quraldardyń 68 paıyzy tozǵan- maman

NUR-SULTAN. QazAqparat – Eldegi sot saraptamalyq nysandardyń materıaldyq-tehnıkalyq bazasyn nyǵaıtý úshin 31 mlrd teńge qajet. Ádilet mınıstrliginiń keńeıtilgen alqa májilisinde osyndaı problema kóterildi, dep habarlaıdy QazAqparat tilshisi.

Mınıstr Qanat Mýsın jıynǵa qatysýshylardan sot saraptamalyq qyzmettiń sapasyn kóterýge ne kedergi bolyp otyrǵanyn surady.

Mamandardyń aıtýynsha, negizgi problema materıaldyq-tehnıkalyq bazaǵa tirelip tur.

«Qazirgi tańda Nur-Sultan qalasynda sot saraptama ortalyǵynyń qurylysy aıaqtaldy. Bul keıingi 10 jyldaǵy eń iri joba deýge bolady. Qazaqstan boıynsha dál osyndaı sot saraptamasynyń ǵımaraty bolyp kórgen joq. Kelesi jyly, odan keıingi jyldary da Parlament pen Qarjy mınıstrligi bizdiń osy astanadaǵy sııaqty ǵımarttardy basqa qalalarda salý týraly usynystarymyzdy qoldaıdy dep úmittenemiz.

Sondaı-aq kúrdeli sot saraptamalaryn ótkizýge qajetti jańa, zamanaýı qondyrǵylar satyp alsaq degen oıymyz bar. Mysaly, daktıloskopııalyq-genomdyq saraptama júrgizýge, molekýlıarlyq-genetıkalyq zerthana jumystaryn júrgizýge arnalǵan qurylǵylar kerek», -dedi vıtse-mınıstri Azamat Ámirǵalıev.

Onyń aıtýynsha, álemde sot sarapatamasynyń tásilderi jyldam damyp jatyr. Sol úshin jyl saıyn qondyrǵylar men quraldardy jańalap otyrýǵa bıýdjetten 1,5 mlrd teńge surap júr.

Sot saraptamalar ortalyǵy dırektorynyń mindetin atqarýshy Rahmetolla Nuǵmanovtyń aıtýynsha, saraptama óndirisinde qoldanylatyn quraldardyń basym bóligi tozǵan. Eń jańa degenderiniń ózine 5 jyl buryn alynǵan.

«Jalpy materıaldyq-tehnıkalyq baza boıynsha qajetti quraldarǵa 31 mlrd teńge kerek bolyp tur. Balansymyzda 19,2 mlrd teńgeniń múligi bar. Sonyń ishinde 9 mlrd teńgeniń múligi óndiriske tikeleı qatysty. Bul 9 mlrd teńgelik bazanyń 68 paıyzy tozǵan. Tek 32 paıyzy qaldy. Sonda 6,5-7 mlrd teńge qazirdiń ózinde qajet degen sóz. Sońǵy alǵan qondyrǵymyzdyń ózi 2016 jyly shyqqan. Onyń aldyndaǵylary tipti 2007 jyldary alynǵan», -dedi maman.