Sot saraptamasyn júrgizý qyzmeti Densaýlyq mınıstrliginen Ádilet mınıstrligine beriledi
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń sot-saraptama qyzmeti týraly» zań jobasyn birinshi oqylymda maquldady.
Qazaqstandaǵy quqyq qorǵaý júıesin jetildirýdiń 2014-2020 jyldarǵa arnalǵan baǵdarlamasynda sot saraptamalyq qamtamasyz etýdi jetildirý máseleleri qarastyrylǵan bolatyn. Osyǵan oraı, atalǵan zań jobasy sot-saraptama qyzmetin akkredıtteýdi halyqaralyq standarttar deńgeıine deıin jetildirýdi kózdeıdi.
«Zań jobasyna sáıkes, medıtsınalyq, narkologııalyq jáne psıhıatrııalyq sot saraptamalaryn júrgizý fýnktsııalaryn Densaýlyq saqtaý mınıstrliginen Ádilet mınıstrligine berý kózdeledi. Osylaısha, sarapshylyq fýnktsııalary bir memlekettik organda qalyptastyrylatyn bolady. Sarapshylyq fýnktsııalaryn bir vedomstvoda ortalyqtandyrý sot saraptamasy uıymdary jumysynyń tıimdiligin túbegeıli jaqsartýǵa, ishki qaıshylyqtardy joıýǵa septigin tıgizedi. Sot saraptamasy júıesiniń táýelsizdigin de qamtamasyz etedi», - dedi Ádilet vıtse-mınıstri Baqytjan Ábdiraıym.
Onyń aıtýynsha, búgingi tańda sot-medıtsınalyq jáne narkologııalyq saraptamalar qyzmetin bir vedomstvodan ekinshisine kezeń-kezeńimen berý jumystary atqarylýda. Endigi kúni sot-psıhıatrııalyq saraptamasyn berý sharalaryna da daıyndyq bastalady. Bul fýnktsııany Ádilet mınıstrligine berý 2016 jyldyń 1-shildesine qaraı júzege asatyn bolady.
Budan bólek, sot-saraptama qyzmetin akkredıtteýdiń halyqaralyq standarttaryn engizý sharalary da pysyqtalady. Bul rette halyqaralyq akkredıtteýdi Astana jáne Almaty qalalarynda engizý kózdeledi.
«Jeke sot-sarapshylary ınstıtýtyn damytý máseleleri de qamtylyp otyr. Bul osy saladaǵy básekelestikti kúsheıtedi. Jeke sot sarapshylary ınstıtýtyn damytýǵa erekshe nazar aýdara otyryp, arnaıy jabdyqtardy jáne kúrdeli zertteýlerdi talap etpeıtin saraptamalardy básekelestik ortaǵa berýdi josparlaımyz. Osy qadam memlekettik sot sarapshylaryna túsetin aýyrtpashylyqty azaıtýǵa, zertteýlerdi sapaly júzege asyrýǵa múmkindik beredi», - deıdi vıtse-mınıstr.
Taǵy bir jańalyq - zań jobasy aıasynda sot sarapshylar palatasyn qurý kózdeledi. Palatanyń maqsaty - jeke sot sarapshylarynyń qyzmetin uıymdastyrýdy ádistemelik, aqparattyq qamtamasyz etýge baǵyttalatyn bolady.
