Sot saraptamasy isteriniń bir bóligin aýtsorsıngke berý josparlanýda

NUR-SULTAN. QazAqparat – Sot saraptamasy isteriniń bir bóligin aýtsorsıngke berý josparlanyp otyr. Bul týraly Ádilet vıtse-mınıstri Almat Madalıev málim etti, dep habarlaıdy QazAqparat tilshisi.

«Sot-saraptama qyzmeti salasynda básekelestik ortany ary qaraı damytýǵa baǵyttalǵan qadamdardyń biri – sot saraptamalaryn aýtsorsıng arqyly júrgizý», - dedi A. Madalıev.

Onyń aıtýynsha, 2018 jyldyń qarashasynan Joǵarǵy sotpen birlese Nur-Sultan men Almaty qalalarynda sot saraptamasy ınstıtýttarynda qanatqaqty joba iske asyryldy. Bul joba sottarmen bastapqy sot-qurylys, taýartanýshylyq jáne ekonomıkalyq saraptamalardy jeke sot oryndaýshylaryna taǵaıyndaýǵa qatysty.

«Bul qadamdar atqarylǵan jumystyń durystyǵyn kórsetti. Jeke sarapshylar memlekettik mamandarǵa básekelistik týdyrýǵa qaýqarly bolyp otyr. Bul óz kezeginde jeke sarapshylardy jumyspen qamtýǵa, sondaı-aq júktemeni azaıtyp, bıýdjet qarjysyn únemdeýge múmkindik beredi», - dep túsindirdi vıtse-mınıstr.

Onyń sózine qaraǵanda, aldaǵy jyly aýtsorsıngti Іshki ister mınıstrligi jelisi boıynsha engizý josparlanyp otyr.

Ádilet mınıstrliginiń málimetinshe, aýtsorsıngti engizý boıynsha birlesken sharalar jospary, atalǵan jumysty atqarý týraly Іshki ister mınıstrligimen aldyn ala ýaǵdalastyq qadamdary júrgizilgen.