Sot saraptamasy júıesinde endi kompıýterlik tomografııa qoldanylady
ASTANA. KAZINFORM – Qazaqstanda sot saraptamasyna arnalǵan arnaıy úı-jaılar men saraptamalardy júrgizý qaǵıdalaryna ózgerister men tolyqtyrýlar engizildi.
Qujatqa sáıkes, sot-medıtsınalyq, sot-narkologııalyq jáne sot-psıhıatrııalyq saraptamalar júrgiziletin arnaıy jabdyqtalǵan úı-jaılar boıynsha eseptik normatıvter tolyqtyrylady.
Atap aıtqanda, 2-qosymshadaǵy qural-jabdyqtardy ornalastyrýǵa arnalǵan alańdar tizimine kompıýterlik tomografııa júrgizýge arnalǵan úı-jaı engiziledi. Onyń eseptik aýdany 73 sharshy metr bolyp belgilenedi.
Sonymen qatar 5-qosymshada Fılıaldyń máıit saraptamasy bólimshesin medıtsınalyq tehnıkamen jaraqtandyrýdyń eń az normatıvine kompıýterlik tomograf engizilip, bir bólimshe úshin bireýi belgilenedi.
Budan bólek sot saraptamasy organdarynda sot saraptamalary men zertteýlerdi uıymdastyrý jáne júrgizý qaǵıdalaryna da ózgerister engiziledi.
- Máıitke saraptama júrgizip ólimniń sebebin anyqtaý jáne qaýlyda kórsetilgen ózge de máselelerdi sheshý úshin taǵaıyndalady. Saraptama máıitti ashý arqyly júrgiziledi, al qajet bolǵan jaǵdaıda máıitti zertteý barysynda kompıýterlik tomografııany (tıisti jabdyq bolǵan jaǵdaıda) paıdalanady, – delingen qujatta.
Sondaı-aq saraptama erte máıittik ózgerister baıqalǵannan keıin de bastalýy múmkin ekeni naqtylandy. Al bul ózgerister paıda bolǵanǵa deıin máıitti zertteý tek ólim faktisi anyqtalyp, ólim týraly akt rásimdelgennen keıin ǵana júrgiziledi.
Atalǵan buıryq 15 naýryzdan bastap kúshine enedi.
Buǵan deıin Qazaqstanda Úndistannyń sot saraptamasy jáne IT-krımınalıstıka ýnıversıtetiniń fılıaly ashylatynyn jazǵanbyz.
2024 jyly sot saraptamalary qyzmetteriniń tizbesin keńeıtý maqsatynda elimizde sot saraptamasynyń jańa túri zııatkerlik menshik obektilerine saraptama júrgizý qyzmeti iske qosylǵan edi.
