Sot saraptamasy: Qazaqstan Túrkııamen jáne Qytaımen yntymaqtastyqty nyǵaıtady
ASTANA. KAZINFORM – Búgin Astanada sot tórelegi júıesindegi sot saraptamasy taqyrybynda halyqaralyq konferentsııa bastaldy. Osy oraıda Qazaqstan birqatar elmen ózara memorandýmdy bekitti.
- Búgingi halyqaralyq konferentsııa Qazaqstandaǵy sot saraptamasy júıesiniń 75 jyldyǵyna oraı uıymdastyryldy. Basty maqsat – halyqaralyq yntymaqtastyqty nyǵaıtý. Osy oraıda jıynǵa 11 memleketten delegatsııa keldi. Onyń arasynda búgin 4 elmen (Qytaı, Grýzııa, Túrkııa, Ázerbaıjan) memorandýmǵa qol qoıamyz. Bul yntymaqtastyq aıasynda atalǵan eldermen ózara jumysymyzdy kúsheıtpekpiz. Atap aıtqanda, sot saraptama qyzmetin halyqaralyq deńgeıge kóterý eskerilgen, - QR Ádilet mınıstrligi Sot saraptamalary ortalyǵynyń dırektory Baqytjan Baıtilesov.
Osy oraıda ol Reseı, Qytaı jáne Túrkııamen bul saladaǵy qarym-qatynas nyǵaıtylatynyn atap ótti. Konferentsııanyń negizgi taqyryptary sot saraptamasyn damytýdyń zamanaýı baǵyttaryn, tsıfrlyq aktıvter men krıptovalıýtalardy, jasandy ıntellektti, sot-medıtsınalyq saraptamany, esirtki zattarynyń saraptamasyn jáne zamanaýı krımınalıstıkalyq tehnologııalardy qamtıdy.
QR Ádilet mınıstri Erlan Sársembaev 75 jyl ishinde Qazaqstannyń sot saraptamasy salasynda aýqymdy ózgeris bolǵanyn, qazir bul baǵytta zamanaýaı sarapshylyq júıe qalyptasqanyn atap ótti. Qazir bul salada myńnan astam joǵary kásibı maman qyzmet etip jatyr. Sot saraptamasynyń 31 túri bar jáne 60 sarapshylyq mamandyq baǵyty qamtylǵan.
- Qazir sala mamandary ózderiniń kásibı deńgeıiniń arqasynda otandyq sot saraptamasy mektebin nyǵaıtyp keledi, - dedi mınıstr.
Aıta keteıik, buǵan deıin Pavlodar oblysynda 14 jyl burynǵy qylmys DNQ saraptamasy arqyly ashylǵanyn jazǵan edik.
