Sot saraptamalary ortalyǵynyń aqyly qyzmet kórsetýi qanshalyqty zańdy

ASTANA. KAZINFORM — Memlekettik sot saraptamasy mekemeleriniń aqyly negizde qyzmet kórsetýi qoldanystaǵy zańnamaǵa qaıshy kelmeıdi jáne bul qyzmet túri kásipkerlik qyzmet emes. 

Bul týraly QR Ádilet mınıstrligi Sot saraptamalary ortalyǵynyń dırektory Baıtilesov Baqytjan Tólenuly Ortalyq kommýnıkatsııalar qyzmeti alańynda ótken baspasóz konferentsııasynda jýrnalıstiń suraǵyna jaýap berý kezinde málimdedi.

Brıfıng barysynda jýrnalıster Sot saraptamalary ortalyǵynyń óńirlik fılıaldary aqyly negizde maman qorytyndysyn usynyp otyrǵanyn atap ótip, bul qyzmet túriniń jekemenshik sarapshylar jumys istep turǵan básekelestik ortada qanshalyqty zańdy ekeni jóninde suraq qoıdy.

— — Iá, bul zańdy. Birinshiden, sot-saraptamalyq qyzmet kásipkerlik qyzmet emes. Onyń basty maqsaty — paıda tabý emes, saraptama taǵaıyndaıtyn organdardy obektıvti nátıjemen qamtamasyz etý. Sonymen qatar zańnamada ortalyqtyń aqyly negizde zertteý júrgizýine tyıym salynbaǵan. Bizdiń jarǵymyzda zertteýlerdi sharttyq negizde júrgizý quqyǵymyz kórsetilgen, — dedi Baqytjan Baıtilesov.

Spıkerdiń aıtýynsha, Ortalyqtyń jarǵysy tıisti antımonopolııalyq organmen kelisilgen, jáne bul qyzmet mekemeniń qosymsha qyzmet túri retinde qarastyrylǵan.

— Jarǵymyz antımonopolııalyq organmen kelisilgen. Sonymen qatar bul qyzmet ortalyqtyń qosymsha qyzmeti retinde onyń jumys isteýin jáne damýyn qamtamasyz etýge baǵyttalǵan, — dep tolyqtyrdy ol.

Buǵan deıin saraptama nátıjesimen kelispegen jaǵdaıda qaıda júginý kerek ekenin jazǵanbyz.