Sot saraptama salasyndaǵy sarapshy men mamannyń mártebesi aıqyndalmaq
NUR-SULTAN. QazAqparat – Qazaqstannyń sot saraptama salasyndaǵy sarapshy men mamannyń mártebesin aıqyndaý jospary alǵa qoıylyp otyr. Bul týraly tolyǵyraq «Qazaqstan Respýblıkasynyń keıbir zańnamalyq aktilerine sot saraptama qyzmeti máselelerine ózgerister men tolyqtyrýlar engizý týraly» zań jobasy talqylanǵan dóńgele ústelde M.S. Nárikbaev atyndaǵy KAZGUU provosty Sergeı Pen aıtyp berdi, dep habarlaıdy QazAqparat tilshisi.
Sergeı Pen Dúnıejúzilik banktiń osy jyly aıaqtalǵan «Qazaqstan Respýblıkasyndaǵy sot saraptamasyn nyǵaıtý» jobasynyń úılestirýshisi. Joba nátıjesi boıynsha depýtattyq bastama tártibinde Qazaqstan Respýblıkasy Parlamentiniń qaraýyna usynylatyn zań jobasy ázirlengen. Onyń aıtýynsha, zań jobasy boıynsha jumys aldaǵy saılaýdan keıin bastalady.
«Bul zań jobasynda ýákiletti organnyń ǵana emes, sarapshylar qaýymdastyǵy ókilderiniń, sonymen qatar depýtattardyń keıbir usynystary engizilgen. Búgin biz sizderge osy zań jobasynda júzege asyrylyp jatqan jalpy ıdeıalardy tanystyrǵymyz keledi. Men atap ótkim keletin eń mańyzdy másele - bul sońǵy nusqa emes, óıtkeni qujat boıynsha jumys endi bastalyp jatyr», - dedi Sergeı Pen.
Onyń aıtýynsha, zań jobasynyń negizgi ıdeıalary: sarapshy men maman mártebesin delımıtatsııalaý, sot saraptamasynyń jańa sýbektisi - sot saraptamasymen aınalysatyn zańdy tulǵany engizý, azamattyq ister boıynsha sarapshylardyń jumysyna tikeleı aqy tóleý, sot qyzmetin kásipkerlik sanattan alyp tastaý, sot sarapshylaryn sertıfıkattaý ınstıtýtyn engizý, qaıta saraptamalardy uıymdastyrýǵa sot saraptamasy organdarynyń aıryqsha quzyretin shoǵyrlandyrý, sot saraptamasy ádisteriniń qol jetimdiligi men ashyqtyǵyn qamtamasyz etý.
Sarapshy men maman mártebesin aıqyndaý máselesi boıynsha Sergeı Pen sheteldik tájirıbeni eskere otyryp, osy mártebelerdiń jeke aıqyndalmaýy arnaıy ǵylymı bilim ınstıtýtynyń damýyna qaýip tóndiretinin, sot saraptamasyna degen suranysty tómendetip, olardy mamannyń qorytyndysymen almastyrýy múmkin ekenin atap ótti. Saıyp kelgende, polıtseıler men búkil quqyq qorǵaý organdary naǵyz mamandardyń arnaıy ǵylymı bilimderinen bas tartý qaýpi týyndaıdy.
