Sot sarapshylary qańtar oqıǵasyna qatysty qansha saraptama taǵaıyndady

NUR-SULTAN. QazAqparat – Qańtar aıynyń basynda elimizde bolǵan qaıǵyly oqıǵalar kezinde sońǵy derekterge sáıkes 225 adam qaza tapty. al olardyń ólimine ne sebep bolǵanyn anyqtaý sot sarapshylaryna júktelgen. Osyǵan oraı QR Ádilet mınıstrliginiń Sot saraptamasy ortalyǵy dırektorynyń orynbasary Іlııas Ismaılovty sózge tartqan edik.

- Іlııas Jumaǵalıuly, qańtar oqıǵalaryna baılanysty sot-medıtsına sarapshylary jalpy qandaı jumys júrgizdi? Sol qaıǵyly kezeńde sarapshylar qalaı áreket etti?

- Ol ýaqytta QR Ádilet mınıstrliginiń Sot saraptamasy ortalyǵy aýmaqtyq bólimsheleriniń sot-medıtsına sarapshylarynyń jumysy kúsheıtilgen rejımde júrgizildi. Sot-medıtsına sarapshylary elimizdiń zańnamasynda kózdelgen ózderiniń qyzmettik mindetterin oryndady.

- Qańtar qasireti kezinde máıithanaǵa jetkizilgen adamdardyń ólimine ne sebep bolǵan. Oqtan nemese basqa da dene jaraqatynan mert bolǵandar týraly naqty derekter bar A? Órtengen múrdeler kezdesti me? Bandıtterdiń, buzaqylardyń múrdesi jetkizildi me? Olarǵa jáne beıbit turǵyndarǵa qatysty qansha sot-medıtsına saraptamasy taǵaıyndaldy?

- Sot-saraptama qyzmeti týraly zańnamaǵa sáıkes, sot saraptamasyn uıymdastyrý jáne júrgizý kezinde málim bolǵan málimetter jarııa etýge jatpaıdy. Mundaı málimetterdi alý úshin ókiletti organdarǵa júginýge keńes berer edim. Jalpy, mundaı málimetterdi jarııa etkeni úshin tipti qylmystyq ta jaýapkershilik kózdelgen.

- Onda qańtar oqıǵasyna baılanysty qansha sot-medıtsına saraptamasy taǵaıyndalǵanǵa qatysty derektermen bólisseńiz. Olardyń alǵashqy nátıjesi qandaı?

- Búginde qańtar oqıǵasyna qatysty 2 myńnan astam sot-medıtsına, taýarlardy taný, qurylys, órt jáne jarylys-tehnıkalyq, ballıstıkalyq saraptamalar jáne saraptamalardyń ózge de túrleri taǵaıyndalǵan. Bul san kún saıyn ózgerip otyrady desem de bolady.

- Jalpy, qaza tapqandardyń ólimine ne sebep bolǵanyn anyqtaý úshin qansha ýaqyt ketedi?

- Ólim sebebin anyqtaý barysy janama zertteýler keshenin júrgizýdi kózdeıdi. Olardyń qatarynda hımııalyq-toksıkologııalyq, bıologııalyq, sonymen qatar gıstologııalyq zertteýler bar. Osynaý zertteýlerdiń nátıjesi ózge de málimettermen jınaqtala kele sot-medıtsına sarapshylarynyń qorytyndy ázirleýi barysynda baǵalaýyna jatady. Bul rette gıstologııalyq jáne hımııalyq-toksologııalyq zertteýler óndirisiniń protsesi 20 jáne 25 táýlikke deıin sozylýy múmkin. Biraq, sarapshylar óndiristi onyń sapasyn zııan keltirmesten jedel aıaqtaýǵa tyrysady.

- Al óńirlerde qandaı jumys júrgizildi?

- Joǵaryda atap ótkenimdeı, Sot saraptamasy ortalyǵynyń barlyq óńirdegi aýmaqtyq bólimshesi kúsheıtilgen rejımde jumys istedi. Buǵan qosa, jappaı tártipsizdik faktileri oryn alǵan óńirlerge kadrlardy shoǵyrlandyrý qajettigin eskere otyryp, atalǵan oblystarǵa jiberý úshin sot sarapshylarynyń jetkilikti rezervi jasaqtaldy. Qazirdiń ózinde Almaty qalasynda sarapshylar shtatyn kúsheıtý úshin qosymsha 26 maman jiberdik. Dál osyndaı jumys Shymkent qalasynda, Jambyl, Qyzylorda, Almaty, Aqtóbe jáne Shyǵys Qazaqstan oblystarynda júrgizildi. Bul óńirlerge de qajetti kadrlyq rezerv daıyndaý máselesi jan-jaqty pysyqtaldy. Materıaldardyń kelip túsýine oraı sarapshylar atalǵan óńirlerge jiberiletin bolady.

- Qandaı jaǵdaıda ólimniń sebebin anyqtaý qıyndyq týdyrady?

- Ólim sebebin anyqtaýda qıyndyq týdyratyn jaıttar istiń naqty jaı-japsaryna baılanysty. Aıtalyq, ýlaný, kúıik shalý jáne basqalary. Mundaı jaǵdaıda ólimniń sebebin anyqtaý úshin joǵaryda atap ótken zertteýlerdiń janama ádisteri qoldanylady.