Sot salasyna jańa engizilgen zań áli de bolsa jetildirýdi qajet etedi - Joǵarǵy sot ókili
ASTANA. Shildeniń 9-y. QazAqparat /Aıdar Ospanalıev/ - «Bıylǵy jyldan bastap kúshine engen jańa zańda áli de bolsa jetildirýdi qajet etetin máseleler bar», dedi búgin Joǵarǵy sottyń Qylmystyq isterdi baqylaý alqasynyń tóraǵasy Aqyltaı Qasymov elimizdiń sot júıesiniń jarty jyldyq qorytyndysyna arnalǵan Joǵarǵy sot sýdıalarynyń jalpy otyrysynda.
Onyń sózine qaraǵanda, jańa zańda kórsetilgen qylmystyq, ákimshilik jáne azamattyq isterdi qaraý boıynsha biryńǵaı appelıatsııalyq alqa qurý isi mamandandyrý jumystaryn damytý sharasynyń tujyrymdamasyna nuqsan keltirip otyr. Sondaı-aq sot úkimderin appelıatsııalyq, kassatsııalyq jáne baqylaý jolymen qaraý jumystary da kúrdeli máselelerge tap boldy. «Sot tájirıbesi isti kassatsııalyq jolmen qaraý sharasynyń múldem jumys istemeıtindigin kórsetip otyr. Esesine Joǵarǵy sotqa kelip túsetin shaǵymdar sany artýda. Biz qazir aptasyna 100-den 200-ge deıingi aralyqta azamattardyń shaǵymdaryn qaraımyz. Jaǵdaıdyń bulaısha órbýi sot jumysy barysynda kóptegen qatelikterdiń oryn alýyna alyp kelýi yqtımal. Sondyqtan qazir zańnamaǵa tıisti ózgerister engizip, sot isteriniń appelıatsııalyq jáne kassatsııalyq jolmen qaralýyn qamtamasyz etetin ereje engizý qajet. Al Joǵarǵy sot Konstıtýtsııa talaptaryna saı qadaǵalaýshy organ bolýy tıis», dedi A.Qasymov.
