Sot S. Mataevtyń isine qatysty qorǵaýshynyń birqatar ótinishterin qanaǵattandyrmady

Qorǵaýshy Andreı Popov óz sózinde birqatar ótinishterin jarııalaǵan bolatyn. Onda noýtbýkti paıdalaný; tergeý amaldary Almatynyń Medeý aýdanynda júrgizilgendikten, istiń sottylyǵyn ózgertý; S. Mataev pen Á. Mataevqa qatysty bultartpaý sharasyn ózgertý; qosymsha sot-ekonomıkalyq saraptamany júrgizý; isti prokýratýraǵa joldaý ótinishhaty qamtylǵan edi.

«Jasyn, otbasylyq jaǵdaıyn, onyń budan buryn qylmystyq jaýapkershilikke tartylmaǵanyn eskere otyryp, sondaı-aq tergeýden jasyrynýǵa eshbir áreket jasamaǵanyn nemese tergeýge kedergi keltirmegenin nazarǵa ala otyryp, Seıitqazy Mataevqa qatysty úıqamaq túrindegi bultartpaý sharasyn ózgertip, kepilge jiberý bultarpaý sharasyn taǵaıyndaýdy sottan suraımyn», - dedi qorǵaýshy Andreı Petrov.

Onyń sózine qaraǵanda, S. Mataevtyń týystary kepil retinde 500 AEK-ti sottar ákimshisine aýdarǵan, sonymen qatar 500 AEK Áset Mataev úshin de kepil retinde engizildi. Bul turǵyda qorǵaýshy Á. Mataevqa qatysty bultarpaý sharasyn úıqamaqtan kepilge bosatýǵa aýystyrýdy surady.

Búgingi otyrys barysynda sýdıa sot zalyna kardıolog dárigerdi qatystyrý jáne noýtbýk paıdalaný týraly qorǵaýshynyń ótinishin qanaǵattandyrdy. Atap aıtqanda, bul ótinish onyń arterııalyq qysymynyń joǵary bolýyna baılanysty jasaldy.

Budan bólek, sýdıa aıyptalýshylarǵa qatysty zańsyz áreketter Esil aýdanynda jasalǵanyn aıta kele, qylmystyq is Astana qalasy №2 Esil aýdandyq sotynda qaralýy tıis ekenin jetkizdi.

A. Qurmantaev qosymsha sot-ekonomıkalyq saraptamasy turǵysynda basty sot talqylaýy bastalmaǵanyn, osy rette bundaı saraptamaǵa negiz joq degendi aıtty.

Munymen qosa basty sot talqylaýy belgilenbegendikten, isti prokýrorǵa qaıtarýǵa negiz joq ekenin de málimdedi. Sóz sońynda sýdıa basty sot talqylaýynyń merzimi bıylǵy 23 tamyzǵa deıin sozylatynyn jetkizdi.