Sot Rýslan Berdenovtiń jeke kýálik berýin talap etti

ShYMKENT. KAZINFORM - 18 tamyzda úkim shyǵarýǵa deıin taraptardyń jaryssózi ótedi dep kútilip otyr. Prokýror men qorǵaýshy ustanymdaryn bildirip, sodan keıin sýdıa qorytyndy sheshimdi daıyndaýǵa kirisedi.

Shymkentte ákim orynbasary Rýslan Berdenovke qastandyq jasaý isi boıynsha úshinshi sot otyrysy ótip jatyr.

Sýdıa Ábinur Qarabaev jábirlenýshiniń sot protsesine jeke ózi nemese onlaın rejımde qatysýyn talap etti. Ol resmı ókil Jeńis Tynybekke Berdenovpen baılanysyp, bul múmkindikti naqtylaýdy tapsyrdy.

— Eger Rýslan Berdenov kele almasa, tergeý barysynda bergen jaýabynyń beınejazbasy paıdalanylady, - dedi sýdıa.

Ol isti tolyq qaraý úshin jábirlenýshiniń tikeleı qatysýynyń mańyzdylyǵyn atap ótti.

Eske sala ketsek, búgingi sot otyrysynda qorǵaýshy tarap oqıǵa bolǵan jerdi qaraý hattamasy men eki kýágerdiń jaýabyn zańsyz dep taný týraly ótinishhat berdi.

Sot protsesi barysynda Shymkent qalasy ákiminiń orynbasary Rýslan Berdenovke qastandyq jasalǵannan keıin túsirilgen ákimdik ǵımaratynyń ishki beınebaqylaý kameralarynyń jazbalary usynyldy. Bul kadrlardan polıtsııa qyzmetkerleri men jedel-tergeý tobynyń kelgen naqty ýaqytyn anyqtaýǵa bolady.

Osydan keıin sot protsesine úzilis jarııalandy.

Tústen keıin kelesi kýáger – qalalyq qurylys basqarmasynyń basshysy Oljas Tájibaevtan jaýap alynady dep josparlanǵan.

Aıta keteıik, budan buryn Rýslan Berdenovke jasalǵan qastandyq týraly is sotqa joldanǵanyn jazǵan bolatynbyz. 

21 sáýirde Shymkent ákiminiń orynbasary Rýslan Berdenovke qastandyq jasalǵany málim bolǵan. Ol jaraqat alyp, aýrýhanaǵa tústi. 

Rýslan Berdenov aqpan aıynyń sońynda Shymkent qalasy ákiminiń orynbasary qyzmetine taǵaıyndalǵan.