Sot problemalyq «Expo Towers» nysany boıynsha isti toqtatty
ASTANA. QazAqparat - Astana qalasynyń memlekettik sáýlet-qurylys baqylaý basqarmasy problemalyq «Expo Towers» TK boıynsha atqarylǵan sharalar týraly aıtty dep habarlaıdy QazAqparat.
Basqarma málimetinshe, Astananyń mamandandyrylǵan aýdanaralyq ekonomıkalyq soty 12 aqpanda turǵyn úı kesheninde kemshilikterdi joıý turǵysynda mindettemeni qoıý týraly isti toqtatty.
«Basqarma tarapynan Astana qalasy sotyna apellıatsııalyq shaǵym túsirildi», - dep atap ótilgen QazAqparattyń resmı saýalyna berilgen jaýapta.
Ákimdiktiń habarlaýynsha, Memsaraptama jumys jobasy negizinde 2016 jyly ońtaıly qorytyndy bergen jáne turǵyn úı keshenin 3-sanatqa jatqyzdy. Bul nysan 2017 jyldyń qańtarynda paıdalanýǵa berildi.
Turǵyndar keshenge qonystanǵannan keıin, kóptegen kemshilikterdi anyqtady. Olardyń arasynda kireberisterdegi árleý jumystarynyń aıaqtalmaýy, qabyrǵalardyń qısyqtyǵy, dızel-generatorlyq jabdyqtyń bolmaýy, avtomatty órt dabyl belgisi júıesiniń iske qosylmaýy, beınebaqylaýdyń joqtyǵy sekildi kemshilikter baıqaldy.
Shaǵymdardan keıin jospardan tys tekserý júrgizilip, onyń qortyndysy boıynsha qurylys salýshyǵa kemshilikterdi joıý týraly nusqama jasaldy. Alaıda bul tapsyrma oryndalmaǵandyqtan, materıaldar Astananyń mamandandyrylǵan aýdanaralyq ákimshilik sotyna joldandy. Qarashada sot ákimshilik jazaǵa tartyp, «Altaır Jıl Stroı» qurylys salýshysyna 100 AEK kóleminde aıppul saldy.
