Sot pen BAQ-tyń ókilderi bir-birin neǵurlym jaqsy túsinse, qoǵamdyq qaýipsizdik te soǵurlym nyǵaıa túsedi - Joǵarǵy sot tóraǵasy
ASTANA. Qarashanyń 5-i. QazAqparat /Aıdar Ospanalıev/ - Buqaralyq aqparat quraldarynda sot salasyna qatysty jarııalanǵan materıaldardy saraptaý jumystary sot júıesinde kóńil toltyrarlyqtaı ózgeristerdiń bar ekendigin kórsetti.
Onyń ústine sońǵy jyldarda sot organdaryna shaǵymdanýshylar sany artyp otyr. Osynyń ózi azamattardyń sot qyzmetine degen seniminiń kórsetkishi deýge bolady. Bul týraly búgin Astanada ótip jatqan «Sot bıligi jáne BAQ» turaqty forýmynda Joǵarǵy sot tóraǵasy Musabek Álimbekov málim etti, dep habarlaıdy QazAqparat.
Onyń aıtýynsha, sot ta aqparat quraldarynyń ókilderi de qoǵamda bolyp jatqan máselelermen aınalysady. «Bul oraıda sot pen aqparat quraldarynyń ókilderi bir-birimen neǵurlym jaqsy til tabysa bilse, qoǵam soǵurlym ádilettilikke jaqyn bolady. Sonda ǵana biz qoǵamdaǵy qaýipsizdikti qamtamasyz ete alamyz» dedi tóraǵa.
Onyń paıymdaýynsha, kópshilik sot organdarynan basqa organdarǵa qaraǵanda kóp nárse kútedi. Bul óz kezeginde sot qyzmetkerlerine úlken jaýapkershilik júkteıdi. «Sot bıliginiń qoǵam aldyndaǵy keskin- kelbeti olardyń ózderine baılanysty. Sondyqtan da biz búgin óz qatarymyzdy kezdeısoq adamdardan tazartýǵa tyrysýdamyz.
Buny sot salasynyń qyzmetkerleri jaqsy túsinip otyr. Aıtalyq, sýdıalardyń keıbiriniń sońǵy ýaqytta birshama jaısyz oqıǵalarǵa qatysty bolǵandyǵy barshaǵa málim. Olar sot salasynda uzaq jyldar qyzmet etkenine qaramastan «maǵan bir ret jibergen kemshiligim úshin keshirimmen qaramady» degen joq. Qaıta óziniń laýazymynyń qanshalyqty bıik jáne oǵan degen jaapkershiliktiń de joǵary ekendigin túsine otyryp, óz erkimen qyzmet ornyn bosatty. Mundaı máselelerge túsinistikpen qaraǵan jón», dedi M.Álimbekov.
