Sot Pavel Dýrovtyń qamaýdaǵy merzimin uzartty
ASTANA. KAZINFORM – Frantsııanyń sot organdary Telegram negizin qalaýshy Pavel Dýrovty qamaýda ustaý merzimin uzartty, dep jazady TASS.
France-Presse agenttiginiń habarlaýynsha, jaýap alý úshin qamaýda ustaýdyń bastapqy merzimi 96 saǵatqa deıin sozylýy múmkin.
LCI telearnasynyń habarlaýynsha, Telegram negizin qalaýshy Pavel Dýrov bir kún buryn Parıjdiń Le-Býrje áýejaıynda ustalǵan. Kásipker Ázerbaıjannan kelgen. Onyń qasynda bir qyz ben kúzetshisi bolǵan.
Frantsýzdyq TF1 telearnasy eldiń quqyq qorǵaý organdary Dýrovty «esirtki saýdasyna, balalarǵa qarsy qylmystarǵa jáne alaıaqtyqqa» qatysy bar degen kúdikpen qamaýǵa alǵanyn habarlady. Qamaýǵa alý orderin Frantsııanyń Ulttyq sot polıtsııasy departamenti aldyn ala tergeý negizinde shyǵarǵan. Ol 20 jylǵa bas bostandyǵynan aıyrylýy múmkin. Qazir Dýrov qamaýǵa alyndy, keıin sotqa jetkiziledi.
Dýrov tórt eldiń – Reseıdiń, Karıb teńizi araldarynda ornalasqan Sent-Kıts jáne Nevıs shtatynyń, Frantsııa men BAÁ-niń azamaty ekeni belgili. Reseı Syrtqy ister mınıstrligi Frantsııadaǵy Reseı elshiligi Dýrov tóńiregindegi jaǵdaıdy túsindirý úshin qajetti sharalardy qabyldaǵanyn habarlady.
Ilon Mask Dýrovtyń Frantsııada ustalýyn sóz bostandyǵyna kepildik beretin AQSh Konstıtýtsııasyna engizilgen birinshi túzetýdiń «tartymdy jarnamasy» dep atady. Bolǵan oqıǵaǵa túsinik bere otyryp, ol 2030 jylǵa qaraı Eýropada jaı memderge laık basqandarǵa da ólim jazasy taǵaıyndalýy múmkin ekenin aıtty.
Birqatar saıasatkerler de Pavel Dýrovtyń qamaýǵa alynýyna qatysty pikir bildirdi.
AQSh Kongresi Ókilder palatasynyń múshesi Mardjorı Teılor-Grın Dýrovtyń qamaýǵa alynýyna túsinik bere otyryp, búkil álemde sóz bostandyǵyna shabýyl jasalyp jatqanyn aıtty.
Aýstrııanyń burynǵy syrtqy ister mınıstri Karın Knaısl kásipkerdiń ustalýyn aqylǵa qonymsyz dep sanaıdy.
Frantsııanyń burynǵy Eýroparlament depýtaty Emerık Shoprad Dýrovtyń ustalýyna Parıjdiń Telegram-dy baqylaýǵa degen umtylysy sebep bolǵanyn aıtty.
Telegram messenjeriniń resmı akkaýnty kompanııanyń negizin qalaýshy Pavel Dýrovtyń Frantsııada ustalýyna qatysty alǵash ret túsinikteme bergen edi.
