Sot otyrystaryn ótkizbesten sheshim shyǵaryp kelgen sýdıa bostandyǵynan aıryldy
NUR-SULTAN. QazAqparat - Qyzylorda oblysynda sýdıa 12 azamattyq is boıynsha otyrystardy ótkizbeı, sheshim shyǵarǵan. Іster baspana jáne jerdi satý-satyp alýǵa qatysty bolǵan, dep habarlaıdy QazAqparat QR Sybaılas jemqorlyqqa qarsy is-qımyl agenttigine silteme jasap.
«Bıylǵy 10 jeltoqsanda Shıeli aýdandyq sotynyń sýdıasy Qurmanbaı men onyń hatshysy Qydyrálıevaǵa qatysty aıyptaý úkimi shyǵaryldy. Olarǵa tıisinshe 2 jyl 6 aıǵa jáne 2 jylǵa bas bostandyǵynan aıyrý jazasy taǵaıyndaldy (Qydyrálıevanyń kámelettik jasqa tolmaǵan 4 balasy, onyń ishinde 1 emizýli balasy bolǵandyqtan, jazasy keıinge qaldyryldy).
Qurmanbaı jalǵan ádiletsiz sot aktilerin shyǵarǵany (QK 369-baby 3-bóligi) jáne qyzmettik jalǵandyq jasaǵany úshin (QK 418-baby 1-bóligi) kináli dep tanyldy. Qydyrálıeva sybaılastyǵy úshin qylmystyq jaýapkershilikke tartyldy», - delingen habarlamada.
Atap aıtqanda, Qurmanbaı sot otyrystaryn naqty ótkizbesten, sondaı-aq jalǵan málimetter engizý arqyly 12 azamattyq is boıynsha sheshim shyǵarǵan. Іster turǵyn úıler men jer telimderin satý- satyp alý mámilelerin jaramdy dep tanýǵa qatysty.
«Sottalýshylardyń jas balalary bolǵandyqtan, sot Qurmanbaıdyń jazasyn 5-ten 2,6 jylǵa deıin, Qydyrálıevanyń jazasyn 4-ten 2 jylǵa deıin jeńildetetin jaǵdaı dep tanydy.
Sondaı-aq, olar ómir boıyna memlekettik qyzmette laýazym atqarý quqyǵynan aıyryldy.
Qurmanbaı sot zalynda qamaýǵa alyndy. Úkim zańdy kúshine engen joq», - dedi agenttikten.
