Sot otyrysynyń aýdarmashylaryna nege jalaqy az tólenedi

ASTANA. KAZINFORM – Elordada sot otyrysyna qatysatyn aýdarmashylardyń máselesi qaraldy. 

«Qazaq tilinde ótken sot otyrysynda qatysýshy taraptar orys tiline aýdarýdy suraǵanda másele aýdarmashylarǵa kelip tireletini anyq. Aýdarmashyǵa memleket tarapynan tólenetin qarjy Qazaqstan Respýblıkasy Mınıstrler kabınetiniń 1992 jylǵy qaýlysyna negizdelgen. Oǵan 32 jyl boıy ózgeris engizilmegen. Tólenetin qarjy somasy qazirgi naryq talabyna saı emes. Naqty aıtsaq, aýdarmashynyń sotqa 1 saǵatqa qatysý quny 329 tenge, ıaǵnı bir is boıynsha shamaman 2000-4000 teńge shamasynda tólenedi», - dedi Astana qalasynyń sottarynda memlekettik tildi qoldaný aıasyn keńeıtý jáne damytý jumystaryn úılestirý komıssııasynyń tóraǵasy, sýdıa Aısulý Slambekova.

Mamannyń málimdeýinshe, Mınıstrler kabınetiniń 1992 jylǵy qaýlysyna ózgeris engizý bir kúndik jumys emes. Sondyqtan elorda soty máseleniń sheshý jolyn basqasha qarastyrǵan.

«Sot qyzmetkerleriniń ishinen fılologııa boıynsha joǵarǵy bilimi bar mamandar iriktep alynyp, olar daıarlyq kýrsynan ótti. Arnaıy sertıfıkaty bar mamandar, qajet jaǵdaıda sot isterine aýdarmashy retinde tartylady. Buǵan qatysty qalalyq sot tóraǵasynyń arnaıy ókimi bar», - deıdi ol.

Aıta ketsek, Astanada árbir tórtinshi qylmystyq is qazaq tilinde qaralady.

Búgin elordada qalalyq sottyń uıymdastyrýymen «Sot tóreligin memlekettik tilde júzege asyrý máseleleri» atty dóńgelek ústel ótti.

Sharaǵa sýdıalar, advokattar, Májilis depýtattary men til mamandary qatysty.