Sot oryndaýshysyna aqsha tóleýden qutqaratyn robotty qalaı paıdalanýǵa bolady

ASTANA. KAZINFORM – Robot sot oryndaýshylary iske qosylǵaly beri halyqtyń 600 mln teńgesin únemdegen. Bul týraly QR Ádilet vıtse-mınıstri Bekbolat Moldabekov aıtty. 

— Robot sot oryndaýshy bylaı jumys isteıdi. Mysaly siz kameraǵa túsip qaldyńyz jáne sizge 20 AEK-ke deıin ákimshilik aıyppul jazyldy delik. Eger bir aıdyń ishinde tólemeseńiz, buryn qalaı óndiriletin edi? Іs sot oryndaýshyǵa beriledi. Sot oryndaýshy sizge qońyraý shalady, jumysyńyzǵa hat jazady, aqyry sizden sol aqshany óndiredi. Sol aıyppuldyń kólemi 10 myń teńge bolsa, onyń ústine 2 jarym myń teńge, ıaǵnı aıyppuldyń 25 paıyzyn sol sot oryndaýshyǵa tóleısiz. Osy úshin bizge kóp azamat shaǵymdanady. Sol sebepten biz osyndaı robot sot oryndaýshysyn iske qostyq, - dedi ol Úkimet otyrysynyń kýlýarynda. 

Onyń aıtýynsha, robot sot atqarýshynyń jumysyn avtomatty túrde ózi atqarady. 

— Aıyppul salynǵan adamǵa sms jiberedi. Tipten, eGov mobile-ǵa, Halyk Bank, Kaspi sekildi ol qoldanatyn bank qosymshalaryna habarlama joldap, aıyppuldy qazir tólese, 25 paıyz únemdeıtinin eskertedi. Biraq qońyraý shalmaıdy, - deıdi Bekbolat Moldabekov. 

Vıtse-mınıstr bul qyzmet byltyr tamyz aıynda iske qosylǵannan beri halyqtyń 600 mln teńgesin únemdegenin aıtty. Júıe buǵan deıin elimizde 20 AEK-ke deıingi aıyppuldardy qarasa, bıyl oǵan 40 AEK-ke deıingi aıyppuldardy berý kózdelgen. 

Bekbolat Moldabekovtiń aıtýynsha, osy ózgeris engizilgen soń jyl sońyna deıin halyqtyń 7 mlrd teńgesi únemdeledi.