Sot oryndaýshylary kirise almaıtyn bereshek somasy 157 myń teńgege deıin keńeıtilýi múmkin

ASTANA. KAZINFORM — Memleket aldyndaǵy salyq pen aıyppul bereshegi 20 aılyq eseptik kórsetkishke (78 640 teńge — red.) jetpeıtin azamattardyń isine sot oryndaýshylardy jolatpaı, robot arqyly óndirý tásili halyqtyń 900 mln teńgesin únemdep qalǵan.

Májilis tóraǵasynyń orynbasary Dánııa Espaeva Úkimet saǵatynda osyndaı derek keltirdi.

— Azamattardan sot oryndaýshylardyń áreketine qatysty kóptegen shaǵym túsip jatyr. Qoǵamda sot oryndaýshylarǵa degen jaǵymsyz kózqaras qalyptasqan. Depýtattarǵa halyqtan jıi keletin shaǵymdardyń biri — óndirip alynatyn somanyń 25 paıyzyn sot oryndaýshylary óz qyzmeti úshin alýy. Osyǵan baılanysty depýtattar azamattarǵa túsetin qarjy júktemesin azaıtý úshin byltyr ońaılatylǵan is júrgizý ınstıtýtyn engizdi. Endi 20 aıyq eseptik kórsetkishke deıingi ákimshilik aıyppuldar men salyq bereshekterin robot óndiredi. Sot oryndaýshy múldem qatyspaıdy. Osynyń arqasynda azamattardyń 900 mln teńgeden astam teńgesi únemdelgen, — dedi ol.

Sondaı-aq, Dánııa Espaeva búl shekti áli de ulǵaıtý kerektigin aıtty.

— Aldaǵy ýaqytta bul shekti 40 AEK-ke deıin (157 280 teńge — red.) keńeıtý josparlanyp otyr, — dedi Májilis tóraǵasynyń orynbasary.

Buǵan deıin Ádilet mınıstri Erlan Sársembaev ta sot sheshimin tsıfrlyq tehnologııalar arqyly oryndatý jumysynyń aıasy keńeıetinin aıtqan edi.