Sot oryndaýshylary qyzmetiniń 80 paıyzdan astamy elektrondy formatta atqarylady — Ádilet mınıstrligi
ASTANA. KAZINFORM – Sot oryndaýshylary is-áreketteriniń 80%-dan astamy elektrondyq formatta júzege asyrylady. Bul týraly OKQ alańynda ótken baspasóz konferentsııasynda aıtyldy.
Memlekettik organdardyń, sondaı-aq qarjy uıymdarynyń aqparattyq júıelerimen yqpaldasý, atqarýshylyq qujatty oryndaý úshin qajetti málimetterdi alý, sondaı-aq májbúrlep oryndaý sharalaryn qabyldaý ýaqytyn edáýir qysqartýǵa múmkindik berdi.
«Ádilet mınıstrligi atqarýshylyq is júrgizý protsesin avtomattandyrý boıynsha jumys júrgizýde, sonyń arqasynda búgingi tańda sot oryndaýshylarynyń is-áreketteriniń 80%-dan astamy júıede júzege asyrylady», — dedi QR ádilet vıtse-mınıstri Danıel Vaısov OKQ alańynda ótken baspasóz konferentsııasynda.
Azamattarǵa yńǵaıly bolý jáne atqarýshylyq is júrgizýdiń ashyqtyǵyn arttyrý úshin arnaıy servıster (onlaın bereshekti tóleý, SMS habarlama, júıedegi Taraptar kabıneti, boryshkerler tizilimi) quryldy, olar oryndaý boıynsha barlyq áreketterdi qadaǵalap qana qoımaı, sonymen qatar barlyq shekteý sharalaryn avtomatty túrde alyp tastaı otyryp, onlaın rejımde bereshekti tólem jasaýǵa múmkindik beredi.
Sondaı-aq otyrysta 2024 jylǵy 19 tamyzda ońaıtylǵan is júrgizý ınstıtýtyn engizýdi kózdeıtin zań kúshine enetini aıtyldy. Ońaılatylǵan óndiristiń negizgi mindeti — JSO qyzmetine aqy tóleýden bosatý arqyly halyqtyń qarjylyq júktemesin azaıtý.
«Ózderińiz biletindeı, jeke sot oryndaýshysy qujatty oryndaǵan jaǵdaıda, boryshker negizgi boryshynan basqa, JSO qyzmetin zańnamada belgilengen mólsherde de tóleýge tıis (3%-dan 25%). Ońaıtylǵan is júrgizý, óz kezeginde, tek negizgi qaryzdy tóleýdi qarastyrady, óıtkeni oryndaý protsesi JSO qatysýynsyz tolyǵymen avtomattandyrylady», — dedi QR ádilet vıtse-mınıstri Danıel Vaısov OKQ alańynda ótken baspasóz konferentsııasynda.
