Sot oryndaýshylarǵa AdiletGov mobıldi qosymshasy arqyly shaǵymdanýǵa bolady
ASTANA. KAZINFORM — AdiletGov mobıldi qosymshasy iske qosylǵan sátten bastap 2,5 myńnan astam azamat sot oryndaýshylaryna júginip, óz máselelerin oryndaýshylyq is júrgizý sheńberinde sheshti. Bul týraly Jeke sot oryndaýshylarynyń respýblıkalyq palatasynyń baspasóz qyzmeti málim etti.
AdiletGov mobıldi qosymshasy Qazaqstan Respýblıkasynyń Ádilet mınıstrligi men Jeke sot oryndaýshylarynyń respýblıkalyq palatasy birlesip ázirlegen. Joba maqsaty — oryndaýshylyq is júrgizýdiń qoljetimdiligin jáne ashyqtyǵyn arttyrý.
Qosymsha arqyly azamattar oryndaýshylyq is júrgizýdiń barysy týraly aqparat ala alady, sot oryndaýshylary qabyldaǵan sharalardy kóre alady, ótinishter, aryzdar men shaǵymdar jibere alady, sondaı-aq olardyń qaralý mártebesin baqylaı alady.
Paıdalanýshylar naqty ýaqyt rejıminde sot oryndaýshysynyń qandaı is júrgizý áreketterin oryndaǵanyn kóre alady. Eger belgili bir áreketter oryndalmaǵan bolsa, olardyń qabyldanýy jóninde ótinish joldap, bes jumys kúni ishinde jaýap ala alady.
Sot oryndaýshysy belgilengen merzimde jaýap bermegen nemese tıisti áreketterdi oryndamaǵan jaǵdaıda, ótinish avtomatty túrde óńirlik palata men ádilet departamentine joldanady.
AdiletGov mobıldi qosymshasyn Google Play jáne App Store platformalarynan júktep alýǵa bolady.
Aıta keteıik, Ádilet mınıstrligi azamattardy jalǵan sot oryndaýshylardan saqtandyrdy.