Sot oryndaýshylardyń qyzmetin baqylaý fýnktsııasyn Sot ákimshiligine qaıtarý usynyldy

ASTANA. KAZINFORM – Májilistegi sot oryndaýshylardyń qyzmetin jetildirýge arnalǵan Úkimet saǵatynda depýtattar Sot oryndaýshylardyń qyzmetin baqylaýdy Sot ákimshiligine qaıta berý usynyldy.

- Sot memleket atynan sheshim shyǵarady. Al sol sheshimniń durys oryndalýy jeke sot oryndaýshylardyń qolynda. Osydan kelip azamattardyń memleketke degen ókpesi paıda bolady. Osyǵan baılanysty meniń naqty usynysym bar. Sot ákimshiligi deıtin organ bar ǵoı. Sot oryndaýshylardyń qyzmetin baqylaý fýnktsııasyn Ádilet mınıstrliginen alyp osy Sot ákimshiligine berý kerek sııaqty, - dedi Abzal Quspan.

Ádilet mınıstri Erlan Sársembaev baqylaý fýnktsııasyn bir organnan basqa berý problemany túpkilikti sheshpeıtinin aıtyp, ol usynysty qoldamaǵan.

Alaıda depýtat Murat Ábenov áriptesiniń usynys qýattap, atalǵan fýnktsııany Joǵarǵy sotqa berý kerek degen talap qoıdy.

- Jeke sot oryndaýshylar palatasynyń áńgimesin tyńdap otyrmyn. Ǵımaratty súrip tastaý máselesin ákimdikterge bereıik, balanyń ata-anasymen kezdesý máselesin Oqý-aǵartý mınıstrligine bereıik dep otyr. Ondaı durys emes. Jaýapkershilik alǵan ekensizder, bárin moıynǵa alyńyzdar. bolmasa, moıyndaý kerek. «Qolymyzdan kelmedi, ókilettilikti Joǵarǵy sotqa bereıik», - deńizder. Qoldaryńyzdan kelmeıtini ras qoı, kórip turmyz. Birneshe jyl boıy mınıstrliktiń qolynan kelmedi. Qaıtadan Joǵarǵy sotqa berý kerek dep esepteımin. Bul usynysty Úkimet saǵatynyń hattamasyna engizeıik, - dedi depýtat.

Osy jıynda shaǵyn nesıesin ótemegen azamattardyń 2,5 mln qujaty jeke sot oryndaýshylardyń qolynda júrgeni málim boldy.