Sot oryndaýshylar jarty jylda 18 mlrd teńgeden astam alıment óndirdi

ASTANA. KAZINFORM — Jyl basynan beri jeke sot oryndaýshylar alıment tólenbegen isteri boıynsha 18 mlrd teńge óndirdi. Bul týraly respýblıkalyq sot oryndaýshylar palatasynyń baspasóz qyzmeti habarlady. 

Palatanyń aıtýynsha, balalardyń quqyqtaryn qorǵaý jumysy tek májbúrleý sharalarymen shektelmeıdi. Sot oryndaýshylar jan-jaqty sheshimder izdestirip, tipti boryshkerlerdi jumysqa ornalastyrýǵa atsalysady. Máselen, jyl basynan memlekettik organdarmen birlesip 329 bos jumys oryndary jármeńkesi ótkizilgen.

Nátıjesinde 2722 boryshker jumysqa turǵan. Bul olarǵa qaryzdaryn óteýge jáne ata-analyq mindetterin oryndaýǵa múmkindik berdi.

− Erli-zaıyptylardy tatýlastyrýǵa jáne otbasyn saqtap qalýǵa da erekshe nazar aýdarylady. Jyl basynan beri elimizde 2221 jup tatýlasqan. Batys Qazaqstan oblysynda tipti qylmystyq qýdalaý toqtatyldy, erli-zaıyptylar arasyndaǵy dıalog qalpyna kelgen soń 7 qylmystyq is jabyldy. Al mindettemelerdi oryndaýdan qasaqana jaltarǵan jaǵdaıda qatań sharalar qoldanady. Jeke sot oryndaýshylar bastamasymen 2615 boryshker ákimshilik jaýapkershilikke, 254-i — qylmystyq jaýapkershilikke tartyldy, − dep jazylǵan palata habarlamasynda.

Degenmen, qol jetken nátıjelerge qaramastan, alıment óndirý júıesin áli de jetildirý qajet. Osyǵan oraı, jeke sot oryndaýshylar palatasy Parlament depýtattarymen jáne múddeli memlekettik organdarmen birlesip, zańnamalyq túzetýlerdi daıyndaǵan. Olar kúz bastalysymen Parlamentte qaralmaq.

Buǵan deıin astanalyq prokýratýra alıment tóleýden jaltarǵandarǵa qandaı jaza qarastyrylǵanyn túsindirgen edi.