Sot oryndaýshylar «Otbasy bank» salymshylarynan 3,4 mlrd teńge jymqyrǵan — Úkimet saǵaty

ASTANA. KAZINFORM — Májilis depýtaty Baqytjan Bazarbek Úkimet saǵatynda jeke sot oryndaýshylary jasaǵan óreskel áreketterdi jipke tizgendeı baıandap berdi.

— «Otbasy banktiń» materıaldary boıynsha, 3 jeke sot oryndaýshy azamattardyń jınaqtaǵan qarajatynan túrli syltaýlarmen 3 mlrd 442 mln teńge jymqyrǵan. 2023 jyly jeke sot oryndaýshylar 4740 esepten shyǵarý aktisi arqyly 1 mlrd 721 mln teńgege qaltasyna salǵan. Al 2024 jyly 8995 akt arqyly 1 mlrd teńgege jýyq aqsha sheship alǵan. Bul alaıaqtyqty iske asyrý úshin jeke sot oryndaýshylar jyljymaıtyn múlikti satý, jalǵa alý agenttikterimen, rıeltorlarmen, notarıýstarmen aýyz jalasqan. Bári bir qylmystyq top bolyp jumys istegen, — dedi ol.

Depýtattyń paıymdaýynsha, jeke sot oryndaýshylardyń ashyq tizbesin engizý kerek. 

— Azamattar ár jeke sot oryndaýshyny áreketine saı baǵalap, reıtıngisi tómen, qoǵam narazylyǵy men ashýyna ilikkender saladan birjola alastatylýy kerek. Jeke sot oryndaýshylardy memlekettik fýnktsııalardy atqaratyn laýazym ıeleriniń qataryna engizý kerek. Sonda ǵana Sybaılas jemqorlyqqa qarsy is-qımyl agenttigi men Qarjylyq monıtorıng agenttigi qylmystyq jaýapkershilikke tarta alady. Qazir halyq bandıt pen qaraqshydan emes, polıtsııa men sot oryndaýshydan qorqady. Sot sheshimin oryndatýǵa mindetti qyzmetkerdiń ózi qylmysker alaıaq bolsa, ne bolmaq, — dedi Baqytjan Bazarbek.

Osy jıynda shaǵyn nesıesin ótemegen azamattardyń 2,5 mln qujaty jeke sot oryndaýshylardyń qolynda júrgeni málim boldy.