Sot organdaryn kezdeısoq adamdardan tazartý qajet - Elbasy
sp;ASTANA. Qarashanyń 18-i. QazAqparat /Aıdar Ospanalıev/ - Sýdıalar memlekettegi jalaqysy eń joǵary memlekettik qyzmetkerlerdiń biri.
Bıylǵy jyly jergilikti sottardyń aılyq jalaqylary birden 60 paıyzǵa artty. Jalaqyny osynsha kólemde birden arttyrý eshqandaı salada bolǵan emes. «Bul sharanyń nelikten qolǵa alynyp otyrǵandyǵyn sýdıalar jaqsy túsinedi degen oıdamyn», dedi
búgin Elbasy Nursultan Nazarbaev Qazaqstan Respýblıkasy sýdıalarynyń V sezinde sóılegen sózinde.
Sondaı-aq elimizde sýdıalardy turǵyn úımen qamtamasyz etý máselesine de kóp kóńil bólinip otyrǵandyǵyn atap ótken Elbasy: «Memleket olardyń zeınetkerlik jasyn ulǵaıtý boıynsha da tıisti sharalar qoldandy. Osyǵan oraı sýdıalar 65 jasqa deıin jumys isteı alady. Al onyń qyzmeti minsiz bolsa, sýdıa 70 jasqa deıin jumys isteı alady. Kórip otyrǵandaryńyzdaı, biz sýdıalar úshin óte kóp múmkindikter jasap otyrmyz. Sondyqtan da biz sýdıalar zańnyń ústemdiginiń kepili bola alatyndaı isterdi júzege asyrady dep úmittenýge quqylymyz», dedi Prezıdent.
Sonymen qatar, Memleket basshysy sot salasynda áli sheshilmegen máselelerdiń kóptigin atap ótti. «Birinshiden, sot organdarynda ar-ujdannan ada azamattar kezdesedi. Sot kadrlaryn irikteý júıesi óte kúrdeli nemese elimizde sot kadrlaryn irikteýge qatysty talap óte qatań. Soǵan qaramastan elimizdiń sot júıesi ózin kezdeısoq adamdardan tolyq qorǵaı almaı otyr. Al elimizdiń búkil quqyq qorǵaý júıesinde tek ary taza, eshqandaı dúnıege satylmaıtyn azamattardyń ǵana jumys isteýi shart», dedi Prezıdent.
