Sot organdary azamattardyń basty qorǵany bolýy kerek – Memleket basshysy
ASTANA. KAZINFORM – Biz sottardyń táýelsiz bolýyna basa mán berip otyrmyz. Bul týraly Qazaqstan sýdıalarynyń sezinde QR Prezıdenti Qasym-Jomart Toqaev málim etti.
«Shyn máninde bul jıynnyń elimiz úshin mán-mańyzy zor. Ádil sot – memleket tiregi. Sot bıligi qashan da abyroıly iri minsiz bolýy tıis. Qazir bárimiz bir el bolyp Ádiletti Qazaqstandy quryp jatyrmyz. Maqsatymyz – ár adamǵa jáne barshaǵa birdeı múmkindik berý. Zań men tártip - ádiletti qoǵamnyń negizgi ólshemi. Bul - zań aldynda bári birdeı, teń quqyly degen sóz. Sol sebepti, sot organdary azamattardyń basty qorǵany bolýy kerek. Elde zań ústemdigi ornasa, halyqtyń bılikke degen senimi nyǵaıady. Al zań men tártip bolmasa, basqa reformanyń tabysty bolýy ekitalaı», - dedi Qasym-Jomart Toqaev.
Prezıdenttiń aıtýynsha, osy salany túbegeıli reformalaý - negizgi mindettiń biri.
«Men bul máselege aıryqsha nazar aýdaramyn. Sot salasy quqyq qorǵaý isinde basty ról atqarady. Biz sottardyń táýelsiz bolýyna basa mán berip otyrmyz. Osyǵan oraı birqatar jumys atqaryldy», - dedi Memleket basshysy.
Budan buryn habarlanǵandaı, búgin elordada QR Prezıdenti Qasym-Jomart Toqaevtyń qatysýymen Qazaqstan Respýblıkasy sýdıalarynyń IX sezi bastaldy.
