Sot Ońtústik Koreıanyń eks-prezıdentiniń áıeline sybaılas jemqorlyq isi boıynsha úkim shyǵarady
ASTANA. KAZINFORM – Sársenbide sot Ońtústik Koreıanyń burynǵy birinshi hanymy, bılikten qýylǵan eks-prezıdent ıÝn Sok Eldiń áıeli Kım Gen Hıge qatysty úkimdi jarııalaıdy. Ol sybaılas jemqorlyq pen para alǵany úshin aıyptalyp otyr. Bul burynǵy birinshi hanymǵa qarsy úsh qylmystyq sot protsesiniń birinshisi, dep habarlaıdy Yonhap aqparat agenttigi.
Seýl ortalyq aýdandyq sotynda úkimdi jarııalaý jergilikti ýaqyt boıynsha saǵat 14:10-ǵa josparlanǵan. Sot otyrysy tikeleı efırde kórsetiledi.
Eger Kım Gen Hı kináli dep tanylsa, erli-zaıyptylar tarıhta sottalǵan alǵashqy prezıdenttik jup bolady. ıÝn Sok El 2024 jyly áskerı jaǵdaı engizýge árekettengeni úshin bes jylǵa bas bostandyǵynan aıyrylý jazasyn ótep jatyr. Oǵan sonymen qatar búlik uıymdastyrý sııaqty qosymsha aıyp taǵyldy.
Prokýror Mın Chýn Kı Kımdi 15 jylǵa bas bostandyǵynan aıyrýdy surap otyr. Aıyptaýlarǵa aktsııalarmen aıla-sharǵylar jasaýǵa qatysý jáne Birlestik shirkeýinen qymbat syılyqtar alý kiredi.
Tergeý nusqasy boıynsha, Kım Gen Hı ońtústikkoreıalyq BMW dıleriniń burynǵy basshysy Deutsch Motors kompanııasymen jáne onyń senimdi adamymen kompanııa aktsııalarynyń baǵamyna aıla-sharǵy jasaý úshin sóz baılasqan. 2010 jyldan 2012 jylǵa deıin olar 810 mln von (565 myń AQSh dollary) kóleminde zańsyz paıda tapqan.
Burynǵy birinshi hanym shamanmen sóz baılasty dep te aıyptaldy: 2022 jyly ol Birlestik shirkeýi ókilinen 80 mln vonǵa baǵaly syılyqtar alǵan jáne bıznes úshin kómek suraǵan dep shamalanyp otyr.
Tamyz aıynan beri qamaýda https://kaz.inform.kz/news/ontustk-koreya-soti-eks-brnsh-hanimdi-kamauga-aluga-sanktsiya-berd-97a7b5/ otyrǵan Kım Gen Hı barlyq aıyptaýdy joqqa shyǵaryp otyr.
Sol kúni sot Birlestik shirkeýimen para alý isi boıynsha baılanysty basqa da aıyptalýshylarǵa úkim shyǵarady. Olardyń arasynda burynǵy prezıdenttiń áıeline qymbat syılyqtar berdi dep aıyptalǵan shirkeýdiń burynǵy qyzmetkeri de bar.
Sondaı-aq «Halyq kúshi» oppozıtsııalyq partııasynyń depýtaty Kvon Son Dongqa da úkim shyǵarylady. Ol shirkeýden 100 mln von zańsyz qarjylandyrý aldy dep aıyptalyp otyr.
Burynǵy birinshi hanymdy Birlestik shirkeýi múshelerin «Halyq kúshi» partııasyna jappaı tartý úshin jáne memlekettik laýazymdarǵa aıyrbas retinde qymbat syılyqtar alǵany úshin taǵy eki sot protsesi kútip otyr.
Buǵan deıin Ońtústik Koreıanyń burynǵy premer-mınıstri 23 jylǵa sottalǵanyn jazdyq.
