Sot Nuraı Serikbaı isindegi shabýyldyń beınejazbasyn jáne DNQ saraptamasynyń derekterin zerttedi
ShYMKENT. KAZINFORM – Nuraı Serikbaı túsirilgen beınejazbaǵa júrgizilgen saraptama qorytyndysy jarııalanǵannan keıin sot qylmystyq is materıaldaryn zertteýdi jalǵastyrdy. Sot otyrysynda qylmys bolǵan jerdegi beınejazbalar, DNQ saraptamasynyń nátıjeleri zerttelip, sottalýshy Sherhan Aımahannyń jaýaptaryndaǵy qaıshylyqtarǵa qaıta nazar aýdaryldy.
Sot otyrysyndaǵy negizgi epızodtardyń biri 11 qańtarda Nuraı Serikbaıǵa jasalǵan shabýyldy tirkegen beınejazbalardy zertteý boldy. Beınejazbalardy qaraý kezinde sot tóraǵasy Sammıdın Temiralıev kadrlarda kórsetilgen jaǵdaılarǵa túsinikteme berip otyrdy.
– Mine, qyz kúrteshe kıip kele jatyr... Keıin ol soqqy jasaıdy... Kórip tursyzdar, ol pyshaqpen uryp jatyr, – dedi sýdıa sot protsesine qatysýshylarmen birge beınejazbany qarap otyryp.
Sot tóraǵasynyń aıtýynsha, kelesi kadrlarda qyzdyń shabýyl jasaǵan adamnan alystaýǵa tyrysqany, keıin kóliktiń janynda qulaǵany kórinedi.
– Osy jerde ol kóliktiń janynda qulap, tizerleıdi. Nazar aýdarsańyzdar, bul jazba janarmaı quıý beketindegi beınejazbamen sáıkes keledi, – dedi sýdıa.
Beınejazbalar qylmystyq is materıaldarynyń bir bóligi retinde zertteldi.
Sot beınejazbalardy qaraǵannan keıin molekýlıarlyq-genetıkalyq saraptamalardyń nátıjelerin zertteýge kóshti. Sarapshylardyń qorytyndysyna sáıkes, Sherhan Aımahannyń sport shalbarynan, ústindegi kıiminen jáne aıaq kıiminen Nuraı Serikbaıǵa tıesili qan anyqtalǵan.
Sondaı-aq tergeý barysynda tárkilengen asúı pyshaǵynan da marqumnyń qany tabylǵan. Sot tóraǵasy buǵan deıin shabýyl sátin esinde joq ekenin aıtqan sottalýshydan saraptama nátıjelerin qalaı túsindiretinin surady.
– Advokattaryńyz sizdiń affekt jaǵdaıynda bolǵanyńyzdy jáne eshteńe esińizde joq ekenin aıtyp otyr. Sonymen birge pyshaǵyńyzdan Nuraı Serikbaıdyń qany tabylǵan. Buǵan ne aıtasyz? – dep surady sýdıa.
– Iá, moıyndaımyn. Bul affekt jaǵdaıynda boldy, – dep jaýap berdi Aımahan.
Alaıda birneshe mınýttan keıin jábirlenýshi tarap advokatynyń suraqtaryna jaýap berý kezinde ol shabýyl jasaǵan sáttiń esinde joq ekenin taǵy aıtty.
– Onda naqty neni moıyndaısyz? Jańa ǵana muny jasaǵanyńyzdy aıttyńyz, al qazir eshteńe esimde joq dep otyrsyz, – dedi advokat.
Bul suraqqa sottalýshy jaýap bergen joq.
Sottalýshy jaýaptaryndaǵy qaıshylyqtar
Sot otyrysynda memlekettik aıyptaýshy da sottalýshynyń jaýaptaryndaǵy qaıshylyqtarǵa toqtaldy. Prokýror Aımahan bastapqy jaýaptaryn tergeý qysymymen bergenin aıtatynyn eske saldy. Alaıda dál sol jaýaptarynda ol 35 emes, jeti-segiz ret pyshaq urǵanyn aıtqan.
– Eger sizdi shynymen jaýap berýge májbúrlegen bolsa, nege jeti-segiz ret urdym dedińiz? Nelikten sizdi barlyq 35 jaraqatty moıyndaýǵa májbúrlemegen? – dep surady prokýror Madııar Ábilqasymov.
Sottalýshy mundaı tujyrymdy oǵan tergeý qyzmetkerleri aıtyp bergenin málimdedi. Osydan keıin memlekettik aıyptaýshy eger tergeýshiler qysym kórsetken bolsa, ony istiń ózge de mán-jaılaryn moıyndaýǵa májbúrleı alatynyn atap ótti.
– Demek, ondaı jaǵdaı bolmaǵan ǵoı? – dep naqtylady prokýror.
– Bolǵan joq, – dep jaýap berdi Aımahan.
Advokat: Іs materıaldaryn zertteý sottalýshynyń ýájderin joqqa shyǵardy
Jábirlenýshi taraptyń advokaty Aıanhan Omarov zerttelgen materıaldar sottalýshynyń nusqasyn tolyq joqqa shyǵarǵanyn aıtty.
– Búgin is materıaldaryn zertteý barysynda bul qylmysty dál sottalýshynyń jasaǵany anyqtaldy. Onyń pyshaq jaraqatyn salǵan sátti esimde joq degen ýájderi rastalmady. Búkil protsess barysynda ol jaýaptaryn ózgertip, óz sózine ózi qaıshy keldi, – dedi Omarov.
Advokattyń aıtýynsha, sottalýshynyń moıyndaý sıpatyndaǵy bastapqy jaýaptary qysym arqyly alynǵany týraly málimdemeleri de dálelin tappaǵan. Ol zerttelgen pyshaqtardyń zaýytta jasalǵanyn jáne kólemine qaramastan sýyq qarý sanatyna jatpaıtynyn túsindirdi.
19 tomnan turatyn qylmystyq is materıaldaryn zertteý aıaqtalǵannan keıin sot úzilis jarııalady.
Aldaǵy sot otyrysynda qylmystyq isti tergeýdi aıaqtaǵan tergeýshini jáne Nuraı Serikbaıdyń máıitin zerttegen sot-medıtsınalyq sarapshyny jaýapqa alady.
Jábirlenýshi taraptyń ótinishi boıynsha sot zalyna arnaıy anatomııalyq maneken jetkiziledi. Sot-medıtsınalyq sarapshy onyń kómegimen Nuraı Serikbaı alǵan 35 pyshaq jaraqatynyń ornalasýyn, baǵytyn, sıpatyn jáne keltirý mehanızmin kórsetedi.
– Tústen keıin biz qylmystyq isti tergeýdi aıaqtaǵan tergeýshini, sondaı-aq Nuraı Serikbaıdyń máıitin zerttegen sot-medıtsınalyq sarapshyny tyńdaımyz. Bizdiń ótinishimiz boıynsha sot zalyna anatomııalyq maneken, marker jáne uzyndyǵy 25 santımetrge deıingi syzǵysh jetkiziledi. Sarapshy barlyq dene jaraqattarynyń ornalasýyn, sıpatyn, baǵytyn jáne paıda bolý mehanızmin kórsetedi: joǵarydan tómen nemese tómennen joǵary baǵytta ma, soqqylar deneniń qaı bóligine jasalǵan jáne qalaı paıda bolǵanyn túsindiredi, – dedi jábirlenýshi taraptyń advokaty Aıanhan Omarov.
Ol bul ótinishti sot buǵan deıin qanaǵattandyrǵanyn aıtty.
Eske sala keteıik, Sherhan Aımahan Nuraı Serikbaıdy «alyp qashý» rásimi arqyly nekege májbúrleý, ańdý jáne erekshe qatygezdikpen jasalǵan adam óltirý boıynsha aıyptalyp otyr.
Tergeý nusqasy boıynsha, 2026 jyldyń 11 qańtarynda ol 21 jastaǵy stýdentke 35 pyshaq jaraqatyn salyp, qyz oqıǵa ornynda kóz jumǵan. Sottalýshyǵa ómir boıyna bas bostandyǵynan aıyrý jazasy taǵaıyndalýy múmkin.
