Sot-narkologııalyq jáne sot-psıhıatrııalyq saraptamalary Ádilet mınıstrliginiń qaramaǵyna enedi

ASTANA. QazAqparat - Aldaǵy ýaqytta sot-narkologııalyq jáne sot-psıhıatrııalyq saraptamalary Ádilet mınıstrliginiń qaramaǵyna kiredi. Bul týraly búgin Ortalyq kommýnıkatsııalar qyzmetindegi brıfıngte QR Ádilet vıtse-mınıstri Baqytjan Ábdiraıym málim etti.

«Sot-medıtsınalyq saraptama ortalyǵy Densaýlyq saqtaý jáne áleýmettik damý mınıstrliginiń quzyrynda bolatyn. Al 1 qańtardan bastap bul ortalyq Ádilet mınıstrliginiń qaramaǵyna berildi. Bizdiń «vedomstvonyń quzyryna ne sebepti berildi?» degen saýalǵa toqtalatyn bolsaq, sot-medıtsınalyq saraptama jumystary qylmystyq, azamattyq nemese ákimshilik istermen jáne tergeýmen baılanysty. Sondyqtan quqyq qorǵaý salasyna jaqyn bolǵandyqtan, olardyń jumystarynyń barlyǵyn bir memlekettik organnyń janyna biriktirý maqsatynda jasalyp otyr», - dedi mınıstrdiń orynbasary.

Osy oraıda ol sonymen qatar bıylǵy 1 shildeden sot-narkologııalyq saraptamasy da Ádilet mınıstrliginiń quramyna kiretinin atap ótti.

«Al 2016 jyldyń 1 qańtarynan bastap sot-psıhıatrııalyq saraptama ortalyǵy da bizdiń mınıstrliktiń qaramaǵyna kiredi dep josparlanyp otyr. Osy ortalyqtardyń barlyǵy Ádilet mınıstrliginiń quzyryna engensin, jalpy saraptama jumysy bir memlekettik organnyń janynda jınalady»,- dedi B. Ábdiraıym.

Onyń sózine qaraǵanda, bul sharalar aıaqtalǵannan keıin, bul saladaǵy máselelerdi jedel sheshýge múmkindik jasalady.