Sot múmkindigi shekteýli semeılik azamatty turǵyn úımen qamtýǵa mindettedi

ASTANA. KAZINFORM — Semeı turǵyny 2016 jyly qaýipti dep tanylǵan ǵımarattyń úlesine ıe bolǵan. Bul múliktiń basqa ıeleri — onyń uly, burynǵy áıeli jáne qyzy.

с
Фото: freepik.com

Abaı oblystyq soty baspasóz qyzmetiniń málimetinshe, talap qoıýshynyń qyzy aýyr syrqatyna baılanysty memlekettik turǵyn úı qorynan turǵyn úı alý kezeginde 1993 jyldan beri, al uly 2017 jyldan beri kezekte turǵan. 2019 jyly Semeı qalasynyń ákimdigi janyndaǵy turǵyn úı komıssııasy onyń qyzy men anasyna eki bólmeli páter bergen. Talap qoıýshy áıelimen ajyrasqandyqtan, ol olardyń otbasyna qosylmaǵan jáne sáıkesinshe turǵyn úı almaǵan.

2018 jyly ajyrasqannan keıin ІІ top múgedegi talap qoıýshy «halyqtyń áleýmettik osal toptary» sanaty boıynsha memlekettik turǵyn úı qorynan turǵyn úı alý úshin bólek kezekke turǵan.

Qazirgi ýaqytta onyń ulyna áıeli men eki balasymen birge apatty ǵımaratty bosatý shartymen memlekettik turǵyn úı qorynan baspana alý kezegi kelgen.

Alaıda, osy úıdiń ıesi bolyp sanalatyn talap qoıýshy da basqa baspanamen qamtamasyz etilmegendikten jáne ol ulynyń otbasyna kirmeıtindikten, odan shyǵýdan bas tartqan.

Osyǵan baılanysty talap qoıýshy densaýlyq jáne otbasylyq jaǵdaıyna baılanysty ulymen birge tura almaıtyndyǵyna baılanysty ákimdikten turǵyn úı berýdi talap etip sotqa júgingen.

Sot jalǵyz baspanasy qaýipti dep tanylǵan azamattardyń kezektilik tártibimen jańa turǵyn úı alýǵa quqyǵy bar ekenin atap ótti. Alaıda, talap qoıýshy osyndaı turǵyn úıdiń ıesi bolyp sanalatynyna qaramastan «apattyq turǵyn úı» sanaty boıynsha kezekke qoıylmaǵan.

— «Áleýmettik jaǵynan osal toptar» sanatyndaǵy kezegi áli kelmegendikten, ony ýaqytsha baspanamen qamtamasyz etpeı shyǵarýǵa bolmaıdy. Sonymen qatar, oǵan usynylǵan nusqalar onyń densaýlyq jaǵdaıy boıynsha talabyna saı kelmeıdi. Sot joǵaryda kórsetilgen mán-jaılardy eskere otyryp, memlekettik organǵa talap qoıýshyǵa ýaqytsha turǵyn úı berýdi mindettedi, — delingen habarlamada.

Buǵan deıin 50 myńǵa jýyq qazaqstandyq turǵyn úı kezeginen shyǵarylǵany anyqtaldy.

Сейчас читают