Sot múgedektiń turǵyn úıge qatysty quqyǵyn qorǵady
ASTANA. QazAqparat - A.Týleýova jaýapker - Aqtóbe qalasynyń turǵyn úı-kommýnaldyq sharýashylyǵy, jolaýshylar avtokóligi jáne avtomobıl joldary MM-ge, Aqtóbe qalasy ákiminiń aparaty MM-ge jáne Aqtóbe oblysynyń Ádilet departamenti turǵyn úı komıssııasynyń sheshimin zańsyz dep taný, memlekettik turǵyn úı qorynan turǵyn úıge muqtaj adamdar kezegine qaıta engizý týraly talap-aryz berip, sotqa aryzdanǵan.
Sot otyrysy barysynda A. Tóleýova jáne onyń jubaıy «týa bitken sańyraý-mylqaý» degen dıagnozben úshinshi toptaǵy múgedek bolyp sanalady, 3 bala tárbıelep otyr, onyń 2-i kámeletke tolmaǵan balalar. Memlekettik turǵyn úı qorynan turǵyn úıge muqtaj adamdar kezegine 2004 jylǵy jeltoqsannan bastap qoıylǵan. A. Tóleýova 2001 jyldan beri óz otbasymen birge jataqhananyń 15,10 sharshy metrdi quraıtyn bir bólmesinde turady. Atalǵan bólme múlikti jekeshelendirý komıssııasynyń sheshimimen talapkerdiń jeke ıeligine tirkelgen. Komıssııanyń 2014 jylǵy 15 jeltoqsandaǵy sheshimimen turǵyn úı qorynan turǵyn úıge muqtaj adamdar esebinen shyǵarylǵan. Sondyqtan, turǵyn úı komıssııasy óz sheshimderinde A. Tóleýovanyń jeke ıeliginde turǵyn úıi bar ekendigin negizge alǵan.
Aqtóbe qalalyq sotynyń sheshimi boıynsha A. Tóleýovanyń talaby qanaǵattandyrylmaǵan. Alaıda, azamattyq jáne ákimshilik ister jónindegi apellıatsııalyq sot alqasynyń sheshimimen Aqtóbe qalalyq soty sheshiminiń kúshi joıylyp, talapker A. Tóleýova memlekettik turǵyn úı qorynan úı alý kezegine qaıta engizilgen. Sonymen birge, apellıatsııalyq sot alqasy, «Qazaqstan Respýblıkasynyń Turǵyn úı qatynastary týraly» Zańynyń jáne 2015 jylǵy 20 aqpanda ratıfıkatsııalanǵan múgedekterdiń quqyqtary týraly Konventsııanyń 28-babynyń erejeleriniń normalaryna sáıkes múgedekterdiń ózderi men olardyń otbasylary tolyqqandy deńgeıde ómir súrýge, onyń ishinde turǵyn úıi bolýǵa jáne ómir súrý deńgeıin úzilissiz jaqsartyp otyrýǵa quqyly ekendigi týraly qaǵıdalardy negizge alǵan. Kassatsııalyq sot alqasynyń qaýlysymen apellıatsııalyq sot alqasynyń sheshimi ózgerissiz qaldyrylyp, jaýapker ókilderiniń kassatsııalyq shaǵymdary qanaǵattandyrýsyz qaldyrylǵan. Sot osyndaı negizdermen, múgedektiń quqyǵyn qorǵady.
