Sot Mladıchti Gaagaǵa ekstradıtsııalaýǵa ruqsat etti
ASTANA. 28 mamyr. QazAqparat - Áskerı qylmystar boıynsha Belgrad soty 27 mamyrda Serbııa qarýly kúshter shtabynyń burynǵy basshysy Ratko Mladıchtiń Gaagadaǵy áskerı qylmystar boıynsha halyqaralyq trıbýnalǵa jóneltiletini jóninde sheshim qabyldady,
dep habarlaıdy Agence France-Presse.
Buǵan deıin Mladıchtiń týystary men advokattary burynǵy generaldyń aýyr haline baılanysty ony Gaagaǵa ekstradıtsııalaýǵa bolmaıtyndyǵy jóninde aıtqan bolatyn. Sondaı-aq olardyń pikirinshe, onyń esh kinási joq kórinedi.
69 jasar kúdiktiniń densaýlyq jaǵdaıyn eki belgi kýálandyra alady: onyń bir qoly jansyzdanǵan,sondaı-aq alda ótken sot otyrysynda ol sýdıanyń qoıǵan suraqtaryna birde-bir tuşymdy jaýap qaıtara almady.
Soǵan qaramastan, 27 mamyrda sot onyń densaýlyǵy Gaagaǵa ushý jolyn kótere alady degen sheshim qabylady.
Mladıch 1992 jyly Serbııa Respýblıkasy Áskerı shtabynyń basshysy bolyp taǵaıyndalyp, 1996 jylǵa deıin ásker basqarǵan bolatyn. Gaaga trıbýnaly prokýrorlarynyń málimdeýinshe, sol ýaqyt aralyǵynda ol birqatar áskerı qylmystar jasaǵan. Onyń ishinde 1995 jylǵy Srebrenıtstegi segiz myń musylmannyń ólimi bar.
Mladıchti izdestirý jumystary sońǵy 16 jyl boıy úzdiksiz jalǵasqan bolatyn. Onyń otbasy sottan ony óldi dep jarııalaýyn da ótinip edi, alaıda sot oǵan negiz joq dep sheshti. Eks-generaldy 26 mamyrda Serbııanyń soltústigindegi Lazerevo aýylynda tutqyndady.
