Sot mınıstr J. Dosqalıevti 10 táýlikke qamaýǵa alý bultartpas sharasyn sanktsııalady - Qarjy polıtsııasy
ASTANA. Qazannyń 4-i. QazAqparat /Marlan Jıembaı/ - Astana qalasynyń №2 Saryarqa aýdandyq soty Densaýlyq saqtaý mınıstri Jaqsylyq Dosqalıevti 10 táýlikke qamaýǵa alý bultartpas sharasyn sanktsııalady. Bul týraly búgin QR Ekonomıkalyq jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.
Buǵan deıin kúdiktiniń turǵyn úıler salýǵa jer telimderin bergendigi úshin 2 páter jáne Qaraótkel kentindegi kottedjdi alǵandyǵyn eske salǵan resmı ókil: «Tergeý barysynda J.Dosqalıevtiń para retinde taǵy 6 páterdi alǵandyǵy anyqtaldy. Olardyń bireýin óziniń jaqyn týysyna tirkep, al 5-eýin satqan», dedi.
Osyǵan oraı, ıaǵnı asa iri kólemdi para alǵandyǵy úshin qozǵalǵan qylmystyq is aıasynda Qarjy polıtsııasy qazannyń 2-de kúdiktini qamaýǵa alý bultartpaý sharasyn tańdaý týraly usynys engizgen. «Ol prokýratýra organdarynyń tolyq qoldaýyna ıe boldy. Sol kúni Astana qalasy №2 Saryarqa aýdandyq sotynyń sýdıasy G.Bylkılova Qarjy polıtsııasy organdary usynǵan Dosqalıevtiń shynaıy densaýlyq jaǵdaıy týraly beınematerıaldardy zerttep, onyń qyzmet jaǵdaıyn paıdalanyp, kez kelgen tergeý jáne ózge amaldardy jasaý múmkindigi bolmaıtyndaı densaýlyq jaǵdaıynyń aýyr kórinisin jasaý arqyly materıaldy sotta obektıvti qaraýǵa jáne isti tergeýge bóget jasaǵan degen qortyndyǵa keldi. Atalǵan mán-jaılardy sot jetkilikti dep sanap, J.Dosqalıevke qatysty 10 táýlikke qamaýǵa alý bultartpas sharasyn sanktsııalady», dedi resmı ókil.
Onyń aıtýyna qaraǵanda, kúdiktiniń aýrýhanada bolýyna ári sot otyrysyna ákelinbeý sebebinen bultarpaý sharasy 10 táýlikke tańdalǵan. Atalǵan merzim ótkennen keıin oǵan aıyp taǵylyp, QR Qylmystyq is júrgizý kodeksiniń 150-shi babyna sáıkes qamaýǵa alý úshin sotqa usynylmaq. «Qylmystyq is tergelýde, ózge aqparattar tergeý múddesine balıanysty jarııalanbaıdy», dep túıindedi sózin M.Jumanbaı.
