Sot Meta men YouTube-ty jasóspirimge ótemaqy tóleýge mindettedi
ASTANA. KAZINFORM – AQSh soty Meta men YouTube-ty áleýmettik jelilerdiń zııany úshin mıllıondaǵan dollar tóleýge mindettedi.
Meta men YouTube AQSh-ta sot sheshimi boıynsha 20 jastaǵy qyzǵa shamamen 6 mıllıon dollar kóleminde ótemaqy tóleýge mindetteldi. Ol áleýmettik jeliler onyń psıhıkalyq densaýlyǵyna zııan keltirdi dep sotqa júgingen.
Talapkerdiń aıtýynsha, ol bala kezinen bastap platformalardy turaqty qoldanǵan, bul depressııa men sýıtsıdtik oılarǵa ákelgen. Ol YouTube-ty 6 jasynda kóre bastaǵanyn, al 9 jasynda áleýmettik jelilerde kúni boıy ýaqyt ótkizgenin aıtqan.
Alqabıler kompanııalar kámeletke tolmaǵan paıdalanýshylarǵa qatysty salǵyrttyq tanytqan degen qorytyndyǵa kelgen. Sonymen qatar, qosymsha aıyppul salý múmkindigi qarastyrylyp otyr, sondyqtan tólenetin jalpy soma keıin artýy yqtımal.
Meta men YouTube ókilderi sot sheshimimen kelispeıtinin jáne ony apellıatsııaǵa beretinin málimdedi. Sot barysynda Mark Tsýkerberg pen Adam Mosserı jaýap bergen.
Talapkerler platformalardyń algorıtmderi jasóspirimderde táýeldilik týdyrý úshin ádeıi jasalady dep málimdegen. Zańgerler bul sheshim áleýmettik jelilerge qarsy jańa sot isteri úshin pretsedent bolýy múmkin ekenin aıtady.
Aıta ketelik TikTok pen YouTube jasóspirimderge táýeldilik týǵyzý aıyptarymen sotqa tartylatyny týraly jazǵan edik.