Sot-medıtsınalyq saraptama Dosqalıevqa deneniń sol jaǵynyń sal bolýy dıagnozyn joqqa shyǵardy

Bul týraly búgin elordada ótken baspasóz máslıhaty barysynda QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.

Onyń aıtýynsha, aǵymdaǵy jylǵy 9 qarashada atalǵan komıssııa Astana qalasynyń tergeý ızolıatoryna baryp, Dosqalıevti medıtsınalyq tekserýden ótkizgen. Sondaı-aq 2000 jyldan bastap onyń aýrý tarıhy, buryn ótkizilgen dárigerler konsılıýmdarynyń qorytyndylary jáne quramynda reseılik jáne qazaqstandyq mamandar bar táýelsiz komıssııanyń tekserýleri zerdelengen.

«Ulttyq ǵylymı-medıtsınalyq ortalyǵy dárigerleriniń Dosqalıevqa osy mekemede 2010 jylǵy 26 qyrkúıekten 12 qazanǵa deıingi aralyqta bolǵan kezeńde qoıǵan «Mı qan aınalymynyń qatań buzylýy» dıagnozy shyndyqqa sáıkes kelmeıdi», - dedi ol.

Sarapshylardyń qortyndysy boıynsha Dosqalıevtiń sol jaq qol-aıaǵynda bulshyq et tonýsy ózgermegen, sol jaq qol-aıaǵynda bulshyq et atrofııasy anyqtalmaǵan, patsıent qysqa ýaqytqa sol jaq qoly men aıaǵyn basqarýsyz qulaýdan ustaıdy. Bul sol jaqty gemıplegııany nemese deneniń sol jaǵynyń sal bolýyn joqqa shyǵarady. Sóıleý qabileti buzylmaǵan. Adekvatty, keńistikti, ýaqytty jáne óziniń tulǵasyn túsinedi. Ózin-ózi kútýin qıyndatatyn qandaı da bir nevrologııalyq jetispeýshilik anyqtalmaǵan, ózgeniń turaqty kómegin qajet etpeıdi. Mamandandyrylǵan statsıonarlyq emdeýge qajetti klınıkalyq kórsetkishter joq.

«Demek, sot-medıtsınalyq saraptamanyń qorytyndysy budan buryn ótkizilgen reseı-qazaqstandyq medıtsınalyq komıssııasynyń táýelsiz zertteýin jáne Dosqalevti tergeý ızolıatorynda ustaýdyń negizdiligin rastaıdy», - dep atap ótken resmı ókil saraptamanyń qorytyndysyna sáıkes, burynǵy mınıstrdiń qylmystyq is boıynsha tergeý amaldaryn júrgizýge, suraqtarǵa jaýap berýge jáne is materıaldarymen tanysýǵa qatysa alatyndyǵyn jarııa etti.

Sondaı-aq M.Jumanbaı qylmystyq is boıynsha barlyq tergeý amaldary Dosqalıev advokattarynyń qatysýymen ótkizilip jatqandyǵyn da aıtty. Oǵan aıyptalýshy retinde quqyqtary túsindirilgen soń tergelip jatqan qylmystyq is boıynsha jaýap berý usynylǵan. Alaıda qylmystyq is júrgizý zańnamasyna sáıkes quqyn paıdalanǵan Dosqalıev úsh ret jaýap berýden bas tartqan.

«Dosqalıevqa qatysty qylmystyq ister tergelýde. Qarjy polıtsııasy organdary tergeý múddesine baılanysty atalǵan qylmystyq isterdi tergeýdiń barysy men nátıjelerin jurtshylyqty onyń óndirisi aıaqtalǵannan soń habardar etý quqyǵyn paıdalaný múmkindigin eskertedi», - dep túıindedi sózin resmı ókil.