Sot materıaldary 60 jyl boıy qupııa saqtalady
ASTANA. 21 sáýir. QazAqparat - Norvegııanyń №1 lańkesi Anders Breıvıkke qatysty sot materıaldary 60 jyl boıy qupııa saqtalatyn boldy, dep habarlaıdy Habar agenttigi.
Alaıda, ádilet organdary munyń sebebin ázirge túsindirmeı otyr. Sonymen qatar, aıyptalýshynyń sózin teledıdardan berýge tyıym salynǵan. Protsestiń ózi sáýirdiń 16-da bastaldy. Breıvıkke búginde Oslonyń ortalyǵynda jarylys jasap, Ýtoııa aralynda 77 adamdy óltirdi degen aıyp taǵylyp otyr. Óz sózine qaraǵanda, terrorshy sumdyq qylmysty 2006 jyldan beri josparlap júrgen. Al byltyrǵy qantógiske daıyndalý úshin ol jumysyn bir jylǵa toqtatypty. Sodan keıin adamdarǵa shabýyl jasaý tásilderine kompıýterlik oıyndardyń kómegimen mashyqtanǵan. «Sebebi, zorlyq-zombylyq - maqsatqa jetýdiń basty quraly», - deıdi atyshýly lańkes.
