Sot Mataevtyń úıqamaqtan bosatý týraly ótinishin qabyldaǵan joq
ASTANA. QazAqparat - Búgin Astana qalasy Esil aýdandyq sotynda aıyptalýshy Seıitqazy Mataev pen Áset Mataevqa qatysty úıqamaqta ustaý týraly sot sheshimi qaıta qaraldy.
Atap aıtqanda, qorǵaýshylar Seıitqazy men Áset Mataevtarǵa qatysty bultarpaý sharasyn úıqamaqtan kepilge bosatýǵa aýystyrýdy suraǵan bolatyn. Degenmen Astana qalalyq sotynyń sýdıasy Murat Nurabaev bul ótinishti qanaǵattandyrǵan joq.
Aıyptalýshylardyń múddesin úsh qorǵaýshy, ıaǵnı Andreı Petrov, Mádına Bakıeva jáne Serikqalı Mýsın qorǵaýda.
Eske sala keteıik, 2016 jyldyń 24 aqpan kúni sot qaýlysy boıynsha Seıitqazy Mataev úı qamaqqa alynǵan. 2016 jyly 21 shildede Almaty prokýratýrasy kúdikti S. Mataevtyń isin Astana qalasynyń №2 Esil aýdandyq sotyna joldady.
Aǵymdaǵy jyly 27 shildede sot Seıitqazy Mataevtyń úıqamaqta bolý merzimin eki aıǵa - 22 qyrkúıekke deıin uzartty.
Qaýly oryndalýy úshin Astana jáne Almaty qalalarynyń Sybaılas jemqorlyqqa qarsy is-qımyldar bıýrosy departamentterine baǵyttaldy.
Atap aıtqanda, sot otyrysy ashyq tártipte ótip jatyr. Osy rette BAQ ókilderi arnaıy zalda sot otyrysyn ekran arqyly tikeleı kórip otyr.
Eske sala keteıik, Almaty qalasy boıynsha Sybaılas jemqorlyqqa qarsy is-qımyl departamentiniń mamandary 2011-2015 jyldar aralyǵynda memlekettiń aqparattyq saıasatyn júzege asyrý úshin bólingen qarajattan 300 mıllıon teńgeden astam qarjyny jymqyrý faktisin anyqtady. Atalǵan aqsha Baılanys, aqparattandyrý jáne aqparat komıteti men "Qazaqtelekom" AQ arqyly bólingen.
