Sot Mádenıet jáne sport mınıstrligin sportshyǵa tıisti syıaqysyn tóleýge mindettedi

ASTANA. KAZINFORM – Astana qalasynyń mamandandyrylǵan aýdanaralyq ákimshilik soty Qazaqstan atynan halyqaralyq jarystarǵa qatysqan sport ardageriniń paıdasyna sheshim shyǵardy.

M. – halyqaralyq deńgeıdegi jarystardyń birneshe dúrkin júldegeri jáne chempıony. Ol 2016 jyldan bastap 2024 jylǵa deıin Qazaqstan týy astynda óner kórsetken. Sportshy 2016-2017 jyldary alǵan júldeli oryndary úshin tıesili aqshalaı syıaqyny tóleý týraly ótinishpen Mádenıet jáne sport mınıstrligine júgingen bolatyn.

Alaıda mınıstrlik talap qoıý merziminiń ótip ketkenin negizge alyp, tólem jasaýdan bas tartqan.

- Bul sheshimmen kelispegen sportshy sotqa júgindi. Іsti qaraý barysynda sot talapkerdiń halyqaralyq sporttyq jetistikterin jáne Qazaqstan atynan synǵa túskenin rastady.

Sot mınıstrliktiń bas tartýyn negizsiz dep tanydy. Sebebi ákimshilik jáne bıýdjet qatynastaryna talap qoıý merzimi qoldanylmaıtyny anyqtaldy. Sonymen qatar, syıaqy tólemderin retteıtin qoldanystaǵy erejelerde ótinish berý merzimine qandaı da bir shekteý qarastyrylmaǵan, - delingen aqparatta.

Sot sondaı-aq uqsas jaǵdaılarda, ıaǵnı 2021-2024 jyldar aralyǵynda dál osyndaı ótinishter boıynsha mınıstrliktiń tólemder jasaǵanyn atap ótti.

Sottyń sheshimi boıynsha, Mádenıet jáne sport mınıstrliginiń 2016 jáne 2017 jyldardaǵy aqshalaı syıaqy tólemderinen bas tartýy zańsyz dep tanylyp, mınıstrlikke tıisti somany óteý mindetteldi.

Sot sheshimi zańdy kúshine endi.

Aıta keteıik, jaqynda Qysqy Azııa oıyndaryna qatysyp, júldeger atanǵan 85 sportshy men 32 jattyqtyrýshyǵa qarjylaı syıaqy berildi.