Sot qyzmetkerleri 10 mln. teńgege Halyq bankiniń túbirtekterin qoldan jasaǵan - Astana prokýratýrasy
ASTANA. QazAqparat - Astana qalasy boıynsha MKD alaıaqtyq jáne «Qazaqstan halyq banki» AQ-nyń túbirtekterin qoldan jasaý faktilerine qatysty qylmystyq is boıynsha is júrgizý aıaqtady. Bul týraly Astana qalasynyń prokýratýrasynyń baspasóz qyzmetinen habaraldy.
Sotqa deıingi tergep-tekserý barysynda anyqtalǵandaı, bul quqyq buzýshylyqty tórt adam jasaǵan, onyń ishinde ekeýi Astana qalasynyń mamandandyrylǵan aýdanaralyq ákimshilik sotynda jumys istegen. Bul adamdar sot ǵımaratynda jáne onyń janynda turǵan jeke tulǵalardan sot taǵaıyndaǵan ákimshilik aıyppuldardy tólegeni týraly túbirtekti aqshalaı syıaqyǵa berýdi suraǵan. Azamattar keliskennen keıin kúdiktiler noýtbýkty, prınterdi jáne «Qazaqstan halyq banki» AQ-nyń derektemeleri jazylǵan lentany paıdalaný arqyly ózderi túbirtek daıyndaǵan.
Sotqa deıingi tergep-tekserý kezinde jalpy somasy 10 647 180 teńge 329 túbirtek qoldan jasalǵany belgili boldy.
Qylmystyq qýdalaý organy 4 kúdiktiniń áreketin QK 177-babynyń 2-bólimi «a,b,v» tarmaqtary, 325-babynyń 2-bólimi (1997 jylǵy redaktsııada), 190-babynyń 2-bólimi 1,2,3-tarmaqtary, 385-babynyń 2-bólimi, 390-babynyń 2-bólimi, 190-babynyń 2-bólimi, 1,2-tarmaqtary, 28-babynyń 5-bólimi, 390-babynyń 2-bólimi boıynsha saralady.
Qala prokýratýrasy atalmysh qylmystyq isti QPK 305-babynyń tártibinde sotqa joldady.
