Sot Qýandyq Bıshimbaevty qamaýda ustaý merzimin 10 shildege deıin uzartty

ASTANA. QazAqparat - QR Ulttyq ekonomıka mınıstrliginiń burynǵy basshysy Qýandyq Bıshimbaevtyń qamaýda ustaý merzimi taǵy bir aıǵa - 2017 jyldyń 10 shildesine deıin uzartyldy, dep habarlaıdy «QazAqparat» HAA-ǵa Astana qalalyq sotynyń baspasóz hatshysy Botagóz Baıanova.

«Astana qalasy Almaty aýdandyq №2 soty kúdikti Bıshimbaev Qýandyq Ýálıhanulynyń qamaýda ustaý merzimin 2017 jyldyń 10 shildesine deıin uzartty», - dep habarlady Botagóz Baıanova.

Eske salaıyq, «Báıterek UBH» AQ basqarmasynyń burynǵy tóraǵasy Qýandyq Bıshimbaevqa qatysty qylmystyq tergeý amaldary júrip jatyr. Sybaılas jemqorlyqqa qarsy is-qımyl ulttyq bıýrosy habarlaǵandaı, ol bir top adammen aldyn ala kelisip, iri kólemde birneshe márte para aldy dep aıyptalýda. Bıshimbaev Qyzylorda qalasynda shyny tabaq shyǵaratyn jáne óńdeıtin zaýyt salý kezinde «Orda Glass» JShS-nyń vedomstvolyq baǵynystaǵy kompanııasy men onyń merdigerlik uıymy «Shymkenthımmontaj» JShS arqyly  1 mlrd. teńge jymqyrý qylmystyq shemasyn uıymdastyrǵan dep kúdikke ilindi.  

12 qańtar kúni Astana qalasy Almaty aýdandyq №2 soty Qýandyq Bıshimbaevqa qatysty ony «qamaýǵa alý» týraly sanktsııa berdi. Tergeý nusqasy boıynsha, Bıshimbaev zańsyz jolmen alǵan aqshalaı qarajatty jeke qajettilikterine jumsaǵan.

Qýandyq Bıshimbaev Prezıdenttiń jarlyǵymen 2016 jyldyń 28 jeltoqsanynda mınıstr qyzmetinen bosatyldy. Ol bul qyzmetinde 8 aı jumys istedi. 2013 jyldyń 30 mamyrynan 2016 jyldyń 5 mamyryna deıin «Báıterek» ulttyq basqarý holdıngi basqarma tóraǵasy boldy.