Sot Qýandyq Bıshimbaevtyń balalaryna tóleıtin alımentti azaıtýdan bas tartty
ASTANA. KAZINFORM – Eks-sheneýnik Qýandyq Bıshimbaev balalaryna tóleıtin alımenttiń kólemin azaıtý týraly ótinishpen sotqa júgingen. Sot burynǵy mınıstrdiń talabyn qanaǵattandyrýdan bas tartty.
Astana qalasynyń kámeletke tolmaǵandardyń isteri jónindegi mamandandyrylǵan aýdanaralyq soty Qýandyq Bıshimbaevtyń burynǵy jary Nazym Qaharmannyń balalaryna alıment tóleý týraly notarıaldyq kelisimniń sharttaryn ózgertý jónindegi azamattyq isti qarady.
Sot taratqan málimetke súıensek, 2020 jyly burynǵy erli-zaıypty arasynda notarıaldyq kelisim jasalyp, oǵan sáıkes ákesi úsh kámeletke tolmaǵan balany asyraý úshin aı saıyn ár aıdyń 20-syna deıin 1,6 mıllıon teńge kóleminde alıment tóleýge mindettelgen.
Talapker atalǵan kelisimdi ózgertip, alıment mólsherin azaıtýdy surady. Ol talabyn jaza ótep jatqanyn jáne jumys istemeıtindigin aıtty.
Sondaı-aq talapker kelisimnen kelesi tarmaqtardy alyp tastaýdy suraǵan:
- balalarynyń kámeletke tolǵannan keıin de aqyly oqý ornynda bilim alýǵa ketetin qosymsha shyǵyndardy óteý;
- balalardyń medıtsınalyq tekserilýi men emdelýine baılanysty shyǵyndardy tóleý;
- jylyna keminde bir ret Qazaqstanda jáne shetelde demalýyna ketetin shyǵyndardy (turý, tamaq, saqtandyrý, kólik jáne basqa da ilespe shyǵyndar) óteý.
Іsti qaraǵannan keıin sot alıment tóleý týraly notarıaldyq kelisimge ózgerister engizýge zańdy negiz joq degen qorytyndyǵa keldi.
— Sot talapkerdiń 2024 jyldyń tamyzynda óz múlkin úshinshi tulǵalarǵa syıǵa berý shartymen berý arqyly ádeıi óziniń materıaldyq jaǵdaıyn nasharlatqanyn anyqtady. Sonymen qatar onyń uzaq merzimge bas bostandyǵynan aıyrylǵanyn jáne kelisimdi tolyq kólemde oryndaý múmkindigi joqtyǵyn eskere otyryp, talapkerde ózine tıesili múlik esebinen mindetin oryndaýǵa naqty múmkindigi bolǵan. Bul jaǵdaı sot tarapynan talapkerdiń adal emes áreketi retinde baǵalandy. Balalardyń quqyǵy men zańdy múddesin eskere otyryp, sot talap aryzdy qanaǵattandyrýdan bas tartty, - dep túsindirdi sotta.
Sheshim zańdy kúshine engen joq.
Eske salaıyq, jyl basynda 24 jylǵa sottalǵan eks-sheneýnik Qýandyq Bıshimbaev qamaýda otyrǵan mekeme ózine yntalandyrý sharalaryn qoldanbaǵany úshin sotqa shaǵymdanǵan edi.
Aıta ketsek, buǵan deıin Qýandyq Bıshimbaevtyń bostandyqta júrgeni jaıly qaýeset taraǵan edi.
Byltyr kúzde eks-sheneýnik Qýandyq Bıshimbaevtyń túrmede jumysqa turmaǵany aıtyldy.
Qýandyq Bıshimbaev azamattyq nekede bolǵan áıelin óltirgeni úshin 24 jylǵa sottaldy.